យោងតាមអាជ្ញាធរកូរ៉េខាងត្បូងបានឲ្យដឹងថា ចំនួនជនជាតិរុស្សីដ៏ច្រើនបំផុត កំពុងស្វែងរកសិទ្ធិជ្រកកោន នៅក្នុងប្រទេសកូរ៉េខាងត្បូង ដោយពាក្យស្នើសុំកើនឡើង ៥ដង កាលពីឆ្នាំមុន ខណៈដែលជនជាតិរុស្ស៊ីបានក្លាយជាក្រុមជនជាតិបរទេសដ៏បំផុតដែលកំពុងស្វែងរកការជ្រកកោន នៅក្នុងប្រទេសអាស៊ីបូព៌ា។

យោងតាមរបាយការណ៍ដែលចេញផ្សាយនៅដើមខែនេះ ដោយការិយាល័យសេវាអន្តោប្រវេសន៍កូរ៉េ បានឲ្យដឹងថា ជនជាតិរុស្ស៊ីសរុបចំនួន ៥.៧៥០នាក់ បានស្វែងរកសិទ្ធិជ្រកកោន នៅកូរ៉េខាងត្បូង ក្នុងឆ្នាំ២០២៣។ តួលេខនោះគឺខ្ពស់ជាង ៥ដងនៃចំនួន ១.០៣៨នាក់ដែលស្វែងរកការការពារ ក្នុងឆ្នាំ២០២២ និងច្រើនជាងចំនួនសរុបនៃការស្នើសុំសិទ្ធិជ្រកកោនពីជនជាតិរុស្ស៊ី ដែលមាននៅចន្លោះឆ្នាំ១៩៩៤ និងឆ្នាំ២០១៩។

បើយោងតាមការិយាល័យសេវាអន្តោប្រវេសន៍ដដែល បានឲ្យដឹងទៀតថា កាលពីឆ្នាំមុន ក៏មានការកត់សម្គាល់ផងដែរនូវចំនួនខ្ពស់បំផុតនៃពាក្យសុំសិទ្ធិជ្រកកោនសរុប សម្រាប់រយៈពេល ៨ឆ្នាំចុងក្រោយនេះ។ ហើយបន្ទាប់ពីជនជាតិរុស្សី ក្រុមអ្នកស្វែងរកសិទ្ធិជ្រកកោន ក្នុងចំនួនច្រើនបំផុត មកពីកាហ្សាក់ស្ថាន ចិន និងម៉ាឡេស៊ី។ ហើយនិន្នាការនេះបានបន្តមានដល់ឆ្នាំនេះ ដោយជនជាតិរុស្សីបង្កើតជាក្រុមដ៏ធំច្រើនបំផុតជាងគេ ក្នុងការស្វែងរកសិទ្ធិជ្រកកោនក្នុងខែមករា។

មូលហេតុទូទៅបំផុតដែលត្រូវបានលើកឡើងដោយអ្នកស្វែងរកសិទ្ធិជ្រកកោន គឺការធ្វើទុក្ខបុកម្នេញខាងជំនឿសាសនា តាមមកដោយការបៀតបៀនផ្នែកនយោបាយ។ ហេតុផលផ្សេងទៀត រួមមានការរើសអើង ចំពោះសមាជិកនៃក្រុមសង្គមជាក់លាក់ណាមួយ ជាតិសាសន៍ ឬសញ្ជាតិ។ យ៉ាងណាក្ដី ការិយាល័យនេះមិនបានបញ្ជាក់ពីមូលហេតុដែលផ្តល់ដោយអ្នកស្វែងរកសិទ្ធិជ្រកកោនរុស្ស៊ីនោះទេ។ គួរបញ្ជាក់ថា ប្រទេសកូរ៉េខាងត្បូងមានច្បាប់អន្តោប្រវេសន៍តឹងរ៉ឹងខ្លាំងណាស់ ក្នុងនោះរួមទាំងការស្នើសុំសិទ្ធិជ្រកកោនផងដែរ៕