តុលាការបានចេញដីកាការពារដល់ដំរីព្រៃជិតផុតពូជរបស់ប្រទេសបង់ក្លាដែស ដែលហាមឃាត់មិនឲ្យមានការចិញ្ចឹម និងមិនឲ្យមានការយកទៅធ្វើអាជីវកម្មផ្សេងៗ។

ក្រុមការពារសិទ្ធិសត្វពាហនៈបានស្វាគមន៍ចំពោះការព្យួរអាជ្ញាប័ណ្ណទាំងអស់របស់តុលាការកំពូល ដូច្នេះ សត្វដំរីអាស៊ីដែលនៅតូច ឬមិនទាន់គ្រប់អាយុ មិនអាចត្រូវបានគេចាប់ និងយកទៅទុកចិញ្ចឹមប្រើប្រាស់បានទៀតទេ។ សត្វដំរីមួយចំនួន នៅក្នុងប្រទេសនេះ ត្រូវបានប្រើប្រាស់ ដើម្បីសុំទាន លេងសៀក ឬកម្មវិធីនានាតាមដងផ្លូវ។

គួរបញ្ជាក់ថា ឥឡូវនេះ មានដំរីប្រហែល ២០០ក្បាលប៉ុណ្ណោះនៅក្នុងប្រទេសបង់ក្លាដែស ដោយប្រហែលពាក់កណ្តាលនៃដំរីទាំងនោះ ត្រូវបានចាប់យកទៅខាំងទុក។ ប្រទេសនេះធ្លាប់ជាទីកន្លែងមួយ ក្នុងចំណោមទីជម្រកដ៏ធំ សម្រាប់ដំរីអាស៊ី ប៉ុន្តែការបរបាញ់ និងការបាត់បង់តំបន់រស់នៅសម្រាប់ពួកវា បាននាំឲ្យមានចំនួនថយចុះគួរឲ្យកត់សម្គាល់។

តាមសេចក្ដីព្រាងកាលពីមុន ដំរីនៅតូច ឬមិនទាន់គ្រប់អាយុ អាចត្រូវបានចាប់យកទៅខាំងទុក ដែលនាយកដ្ឋានព្រៃឈើ បានចេញអាជ្ញាប័ណ្ណដល់ក្រុមកាប់ឈើឲ្យប្រើប្រាស់សត្វទាំងនេះ ដើម្បីដឹកឈើ។ តែដំរីផ្សេងទៀតបានធ្លាក់ទៅក្នុងដៃរបស់ក្រុមសៀក ហើយតុលាការបាននិយាយថា ការប្រើប្រាស់ពួកវាក្នុងអាជីវកម្មបែបនេះបានរំលោភលើលក្ខខណ្ឌអាជ្ញាប័ណ្ណ។

លោក Rakibul Haque Emil ប្រធានអង្គការការពារសិទ្ធិសត្វពាហនៈ People for Animal Welfare Foundation (PAW) ក្នុងប្រទេសបង់ក្លាដែស បាននិយាយថា នេះគឺជា «ដីកាដ៏សំខាន់ខ្លាំងណាស់»។ លោកបានបន្តថា៖ «ដើម្បីជួយដល់ការបង្ហាត់ដំរី អ្នកមានអាជ្ញាប័ណ្ណឯកជន ក្នុងនោះរួមទាំងក្រុមសៀកបានពង្រាត់កូនដំរីដោយឥតមេត្តាពីមេរបស់វា ខាំងវាទុកជាច្រើនខែ រួចធ្វើទារុណកម្មឲ្យពួកវារៀនពីល្បិចលេងសៀកផ្សេងៗ»៕