កាលពីថ្ងៃអាទិត្យម្សិលមិញ មេដឹកនាំប៉ាឡេស្ទីនលោក Mahmoud Abbas បានជួបសម្តែងការគួរសមជាមួយព្រះមហាក្សត្រហ្សកដានី Abdullah II អំឡុងដំណើរទស្សនកិច្ចរបស់លោកទៅកាន់ទីក្រុង Amman ស្របពេលដែលក្រុមអ្នកសម្របសម្រួលពន្លឿនកិច្ចពិភាក្សាលើលទ្ធភាពនៃបទឈប់បាញ់ ដើម្បីដោះលែងចំណាប់ថ្នូរចាប់ដោយក្រុមហាម៉ាស់ ក៏ដូចជានាំយកវិធានការសម្រាប់ពិធីបុណ្យរ៉ាម៉ាដាន ដល់តំបន់ហ្គាហ្សាស្រ្ទីប ។

អំឡុងជំនួប ព្រះមហាក្សត្រ Abdulla បានមានព្រះបន្ទូលព្រមានប្រឆាំងនឹងការបន្តសង្រ្គាមអំឡុងពិធីបុណ្យរ៉ាម៉ាដាន ដែលវានឹងបង្កើនហានិភ័យនៃជម្លោះទ្រង់ទ្រាយធំជាងនេះ ។

ស្របពេលនោះដែរ ទាហានអ៊ីស្រាអែល និងក្រុមខ្មាន់កាំភ្លើងប៉ាឡេស្ទីន បានប៉ះទង្គិចគ្នានៅទូទាំងតំបន់ហ្គាហ្សាស្រ្ទីប កាលពីចុងសប្តាហ៍កន្លងទៅនេះ ។

ទោះបីជាយ៉ាងណាក៏ដោយ ទស្សនីយភាពនៃការទទួលបានបទឈប់បាញ់ ស្ថិតក្នុងស្ថានភាពពុំច្បាស់លាស់ ក្នុងនោះអ៊ីស្រាអែល និយាយថា ពួកគេមានផែនការបង្កើនយុទ្ធនាការកម្ទេចក្រុមហាម៉ាស់ ខណៈដែលក្រុមអ៊ីស្លាម ប្រកាន់គោលជំហរយ៉ាងម៉ឺងម៉ាត់ សម្រាប់ការបញ្ចប់អចិន្ត្រៃយ៍នូវសង្រ្គាមរយៈពេលជិត ៥ខែមួយនេះ ។

យោងតាមការអះអាងរបស់ក្រសួងសុខាភិបាលហ្គាហ្សាគ្រប់គ្រងដោយក្រុមហាម៉ាស បានឲ្យដឹងកាលពីថ្ងៃអាទិត្យថា ទាហានអ៊ីស្រាអែលបានសម្លាប់ពលរដ្ឋប៉ាឡេស្ទីនចំនួន ៨៦នាក់ និង ១៣១នាក់ រងរបួស ក្នុងតំបន់ហ្កាហ្សាស្ទី្របអំឡុងរយៈពេល ២៤ម៉ោងកន្លងទៅ ដែលនាំឲ្យចំនួនអ្នកស្លាប់ បានកើនឡើងដល់២៩.៦៩២នាក់ និងអ្នករបួសឡើងដល់៦៩.៨៧៩នាក់ ចាប់តាំងពីជម្លោះរវាងអ៊ីស្រាអែល និងក្រមហាម៉ាស បានផ្ទុះឡើងជាង៤ខែមកនេះ ។ 

ក្រសួងបានបញ្ជាក់ថា ជនរងគ្រោះជាច្រើននៅតែកប់ក្រោមគំនរកម្ទេចកម្ទីថ្ម ដោយសារតែការទម្លាក់គ្រាប់បែកដ៏ខ្លាំងក្លា និងកង្វះការការពារជនស៊ីវិល និងក្រុមការងារសង្គ្រោះ នៅក្នុងតំបន់បិទច្រកមួយនេះ ៕