លោក Rustem Umerov រដ្ឋមន្ត្រីក្រសួងការពារជាតិ បាននិយាយនៅក្នុងវេទិកា«អ៊ុយក្រែនឆ្នាំ ២០២៤» ក្នុងទីក្រុងគីវថា អ៊ុយក្រែន ប្តេជ្ញាចិត្តធ្វើការបោសសម្អាតអំពើពុករលួយ។ 

មន្ត្រីជាន់ខ្ពស់អ៊ុយក្រែន បានជួបពិភាក្សាអំពីអនាគតរបស់អ៊ុយក្រែននៅឯ«វេទិកាអ៊ុយក្រែនឆ្នាំ២០២៤» កាលពីថ្ងៃទី២៥ ខែកុម្ភៈ មួយថ្ងៃបន្ទាប់ពីខួបលើកទី២នៃសង្រ្គាមពេញទំហឹងរបស់រុស្ស៊ី។

វេទិកាអ៊ុយក្រែនឆ្នាំ ២០២៤ នឹងពិភាក្សាអំពីការសម្រេចបាននូវគោលដៅរបស់អ៊ុយក្រែនក្នុងសង្រ្គាម ការអភិវឌ្ឍកងកម្លាំងការពារ និងសន្តិសុខរបស់ខ្លួន ការអនុវត្តរូបមន្តសន្តិភាពរបស់អ៊ុយក្រែន ការធានានូវកំណើនសេដ្ឋកិច្ច និងការរួមបញ្ចូលទៅក្នុងទីផ្សារពិភពលោក ការធានាសន្តិសុខ ស្ថានភាពនៃការបង្កើត ឧស្សាហកម្មយោធា និងការការពារអាយុជីវិតរបស់ប្រជាជនអ៊ុយក្រែន។

ដោយត្រូវបានដកស្រង់សម្តីដោយអ្នកសារព័ត៌មានឯករាជ្យម្នាក់ លោក Umerov បានថ្លែងថា៖«អំពើពុករលួយក្នុងអំឡុងពេលសង្រ្គាម គឺអាក្រក់ជាងអំពើភេរវកម្មទៅទៀត។ វានឹងមិនមានការចរចាជាមួយអ្នកដែលលួចពីទាហានរបស់យើង និងសង្គមរបស់យើងទេ»។

លោកUmerov បានបញ្ជាក់ថា ក្រសួងការពារជាតិ បានរកឃើញ «សកម្មភាពកិបកេងដែលមានតម្លៃរាប់សិបលានហ៊ីរីវនឿ (hryvnias)» ក្នុងអំឡុងពេលត្រួតពិនិត្យជាប្រចាំនូវការផ្គត់ផ្គង់ស្បៀងអាហារដល់អង្គភាពយោធាក្នុងប៉ុន្មានខែថ្មីៗនេះ។