ឧបនាយករដ្ឋមន្ត្រីអ៊ុយក្រែន លោក Oleksandr Kubrakov នៅថ្ងៃចន្ទ (ទី២៦ ខែកុម្ភៈ) បានឲ្យដឹងថា ទិក្រុងគីវ បានជំរុញប្រទេសប៉ូឡូញឲ្យដាក់ទណ្ឌកម្មដល់អ្នកដែលត្រូវទទួលខុសត្រូវ ចំពោះការធ្លាយកំពប់គ្រាប់ធញ្ញជាតិរបស់អ៊ុយក្រែន នៅតាមព្រំដែន កាលពីចុងសប្តាហ៍កន្លងមក។

គ្រាប់ធញ្ញជាតិអ៊ុយក្រែនប្រមាណជា ១៦០តោន ត្រូវបានធ្វើបំផ្លិចបំផ្លាញ នៅស្ថានីយរថភ្លើងរបស់ប្រទេសប៉ូឡូញ ក្នុងពេលមានការតវ៉ាទ្រង់ទ្រាយធំ ជាអ្វីដែលមន្ត្រីជាន់ខ្ពស់អ៊ុយក្រែន បាននិយាយកាលពីថ្ងៃអាទិត្យ (ទី២៥ ខែកុម្ភៈថា) ជាទង្វើ «និទណ្ឌភាព និងគ្មានការទទួលខុសត្រូវ»។ តាមរយៈវេទិកាបណ្ដាញសង្គម X លោក Kubrakov បានប្រាប់ថា៖ «អ្នកដែលបានបំផ្លាញគ្រាប់ធញ្ញជាតិអ៊ុយក្រែនត្រូវតែរកឲ្យឃើញ កុំឲ្យធ្វើទង្វើបែបនេះទៀត និងទទួលទណ្ឌកម្ម»។

ជុំវិញអ្វីដែលពួកគេលើកឡើងថា ជាការប្រកួតប្រជែងមិនយុត្តិធម៌ពីអ៊ុយក្រែន និងបទប្បញ្ញត្តិបរិស្ថានរបស់សហភាពអឺរ៉ុបនោះ កសិករប៉ូឡូញដែលតវ៉ានៅខែនេះ បានបិទច្រកព្រំដែនជាមួយអ៊ុយក្រែន ក៏ដូចជាផ្លូវហាយវេ ហើយបានធ្វើឲ្យធ្លាយផលិតផលអ៊ុយក្រែនកំពប់ចេញពីទូរថភ្លើងដោយចេតនា។ ហេតុការណ៍នៅមុននេះ ពាក់ព័ន្ធនឹងការធ្លាយកំពប់គ្រាប់ធញ្ញជាតិពីទូរថភ្លើង បានកើតឡើងនៅព្រំដែនជាមួយអ៊ុយក្រែន។

ប្រធានាធិបតីអ៊ុយក្រែនលោក Volodymyr Zelenskiy កាលពីថ្ងៃអាទិត្យ បាននិយាយថា វាមានសារៈសំខាន់ណាស់ សម្រាប់អ៊ុយក្រែន ក្នុងការរក្សាទំនាក់ទំនងយ៉ាងជិតស្និទ្ធជាមួយប៉ូឡូញ ប៉ុន្តែទីក្រុងគីវ ក៏ត្រៀមខ្លួនរួចជាស្រេចដែរ ដើម្បីការពារអាជីវកម្មដែលរងការខូចខាត ដោយសារការបិទព្រំដែនពីសំណាក់ក្រុមបាតុករប៉ូឡូញ៕