កងទ័ពអ៊ីស្រាអែល បានចុះផ្សាយរូបភាពវីដេអូឃ្លីបកាលពីថ្ងៃអាទិត្យដែលពួកគេនិយាយថាបង្ហាញពីលទ្ធផលនៃប្រតិបត្តិការសឹកក្នុងតំបន់ Abasan ស្ថិតនៅភាគខាងកើតទីក្រុង Khan Yunis ។

 យោធាអ៊ីស្រាអែល និយាយអមដោយសេចក្តីថ្លែងការណ៍ថា ពួកគេបានសម្លាប់ក្រុមសកម្មប្រយុទ្ធហាម៉ាស់រាប់សិបនាក់ និងបានកំណត់ទីតាំងអាវុធ និងជើងទម្របាញ់រ៉ុក្កែត អំឡុងការវាយឆ្មក់នៅក្នុងតំបន់ហ្កាហ្សា ។

 រូបភាពវីដេអូឃ្លីប ឃើញជើងទម្របាញ់រ៉ុក្កែត គ្រឿងផ្ទុះ គ្រាប់បែកដៃ កាំភ្លើងវែង និងឧបករណ៍ទំនាក់ទំនង នៅក្នុងអគាររបស់មន្ទីរពិសោធន៍វេជ្ជសាស្រ្ត ។

 ទាហានអ៊ីស្រាអែល និងក្រុមខ្មាន់កាំភ្លើងប៉ាឡេស្ទីន បានប្រយុទ្ធគ្នានៅពាសពេញតំបន់ហ្កាហ្សាស្ទ្រីប កាលពីចុងសប្តាហ៍កន្លងទៅ ខណៈក្រុមអ្នកសម្របសម្រួល បានបង្កើនល្បឿននៃកិច្ចពិភាក្សាជុំវិញបទឈប់បាញ់ដែលអាចធ្វើទៅបាន ដើម្បីដោះលែងចំណាប់ថ្នូរដែលចាប់ខ្លួនដោយក្រុមហាម៉ាស និងនាំយកវិធានការសម្រាប់ការផ្អាកនៅថ្ងៃសម្រាក បុណ្យរ៉ាម៉ាដាន ទៅកាន់តំបន់ហ៊ុមព័ទ្ធដែលរងការវាយប្រហារមួយនេះ។ 

ទោះជាយ៉ាងណា ចក្ខុវិស័យសម្រាប់ការធានាបានបទឈប់បាញ់ណាមួយ មើលទៅដូចជាមិនប្រាកដប្រជា ដោយអ៊ីស្រាអែលនិយាយថា មានផែនការពង្រីកការបោសសម្អាតដើម្បីកម្ទេចក្រុមហាម៉ាស់ ខណៈ ក្រុមសកម្មប្រយុទ្ធ បានប្រកាន់ជំហររឹងមាំ លើការទាមទាររបស់ខ្លួន សម្រាប់ការបញ្ចប់ជាអចិន្ត្រៃយ៍នៃសង្គ្រាមរយៈពេលជិតប្រាំខែនេះ ៕