រដ្ឋមន្រ្តីក្រសួងសេដ្ឋកិច្ចអាល្លឺម៉ង់លោក Robert Habeck និយាយនៅថ្ងៃចន្ទនេះថា អាល្លឺម៉ង់នឹងកែប្រែច្បាប់របស់ខ្លួន ដើម្បីអនុញ្ញាតឲ្យចាប់កាបូន និងបច្ចេកវិទ្យាស្តុកកាបូនក្រោមបាតសមុទ្រ ស្របពេលដែលប្រទេសសេដ្ឋកិច្ចធំបំផុតរបស់អឺរ៉ុបមួយនេះ មានគោលដៅក្លាយជាប្រទេសអព្យាក្រិតកាបូននៅឆ្នាំ ២០៤៥ខាងមុខ ។

បច្ចេកវិទ្យាចាប់ និងស្តុកកាបូន ឬ CCS នឹងយកចេញពីបរិយាកាសនូវកាបូនឌីអុកស៊ីតដែលបង្កឡើងដោយសារដំណើរការឧស្សាហកម្ម ឬចាប់វាពេលបំភាយ រួចស្តុកវាទុកនៅក្រោមដី ។

នៅប្រទេសអាល្លឺម៉ង់ ការប្រើប្រាស់វា ត្រូវបានរឹតបន្តឹងក្រោមច្បាស់ដែលបានអនុម័តកាលពីឆ្នាំ ២០១២ ដែលផ្តល់អំណាចដល់រដ្ឋសហព័ន្ធ ដើម្បីវេតូការប្រើប្រាស់វា ។

ប៉ុន្តែក្នុងនាមជាប្រទេសបំពុលកាបូនឌីអុកស៊ីតធំជាងគេបំផុតនៅអឺរ៉ុប ដែលទំនងជាមិនអាចឈានដល់គោលដៅការបំភាយឧស្ម័នកម្រិតសូន្យនៅឆ្នាំ ២០៤៥នោះ ទីក្រុងប៊ែរឡាំង បានពិចារណាឡើងវិញលើបច្ចេកវិទ្យា CCS ។

លោក Habeck និយាយថា ក្រោមការកែប្រែច្បាប់ថ្មី ការដឹកជញ្ជូនកាបូនឌីអុកស៊ីត និងការស្តុកវានៅក្រោមបាតសមុទ្រ នឹងត្រូវអនុញ្ញាត ។

អំឡុងពេលបង្ហាញយុទ្ធសាស្រ្តគ្រប់គ្រងកាបូនរបស់រដ្ឋាភិបាលអាល្លឺម៉ង់ លោក Habeck បាននិយាយប្រាប់សន្និសីទសារព័ត៌មានថា បច្ចេកវិទ្យាមួយនេះ មានសុវត្ថិភាព ៕