ក្រុមហេសបូឡារបស់ប្រទេសលីបង់ នៅថ្ងៃចន្ទ (ទី២៦ ខែកុម្ភៈ) នេះ បាននិយាយថា ខ្លួនបានបាញ់ទម្លាក់យានដ្រូនប្រភេទ Hermes 450 របស់អ៊ីស្រាអែលលើដែនដីលីបង់ ដោយប្រើមីស៊ីលបាញ់ពីដីទៅអាកាស ដែលនេះជាប្រកាសលើកទី២ របស់ក្រុមឧទ្ទាមមួយនេះ ក្នុងការបាញ់ទម្លាក់យានលើអាកាសគ្មានមនុស្សបើកប្រភេទនេះ។

គួរបញ្ជាក់ថា យាន Hermes 450 គឺជាយានដ្រូនច្រើនដែលមានឧបករណ៍ផ្ទុកច្រើន ផលិតដោយក្រុមហ៊ុន Elbit Systems ជាក្រុមហ៊ុនផលិតអាវុធដែលមានមូលដ្ឋាន នៅអ៊ីស្រាអែល។

ចំណែកយោធាអ៊ីស្រាអែល នៅថ្ងៃចន្ទនេះ បាននិយាយថា ការបាញ់មីស៊ីល ២គ្រាប់ បានកំណត់គោលដៅលើកងទ័ពអាកាសអ៊ីស្រាអែល UAV ដែលកំពុងប្រតិបត្តិការលើដែនដីលីបង់។ ប្រទេសនេះបាននិយាយថា យានដ្រូនទី១ ត្រូវបានស្ទាក់ចាប់ដោយប្រព័ន្ធការពារដែនអាកាស «David's Sling» របស់អ៊ីស្រាអែល ប៉ុន្តែយានដ្រូន «បានធ្លាក់ក្នុងដែនដីលីបង់» បន្ទាប់ពីការបាញ់បង្ហោះលើកទី២។

ក្រុមហេសបូឡាដែលគាំទ្រដោយអ៊ីរ៉ង់ បាននិយាយថា ខ្លួនបានបាញ់ទម្លាក់ ឬរឹបអូសយានដ្រូនបញ្ជាដោយអ៊ីស្រាអែលជាច្រើនគ្រឿង ក្នុងប៉ុន្មានខែនេះ គិតចាប់តាំងពីខ្លួនបានចាប់ផ្តើមការបាញ់ប្រហារតបតគ្នាជាមួយយោធាអ៊ីស្រាអែលឆ្លងកាត់ព្រំដែនភាគខាងត្បូងនៃប្រទេសលីបង់ ដើម្បីជាការបង្ហាញនូវការគាំទ្រដល់សម្ព័ន្ធមិត្ត គឺក្រុមហាម៉ាសប៉ាឡេស្ទីន ដែលបានវាយប្រហារអ៊ីស្រាអែល កាលពីថ្ងៃទី៧ ខែតុលា រហូតបង្កឲ្យមានសង្រ្គាម នៅតំបន់ហ្កាហ្សា៕