លោកស្រី Maryam Nawaz កូនស្រីរបស់អតីតនាយករដ្ឋមន្ត្រីប៉ាគីស្ថាន ៣ដង គឺលោក Nawaz Sharif នៅថ្ងៃចន្ទ (ទី២៦ ខែកុម្ភៈ) ត្រូវបានបោះឆ្នោតជ្រើសរើសជាអភិបាលរដ្ឋ Punjab ដែលជារដ្ឋមានប្រជាជនច្រើនជាងគេរបស់ប្រទេស ដោយការទទួលបានតំណែងនេះ គឺជាឱកាសរីកចម្រើនមួយ ដើម្បីគូសបញ្ជាក់នូវការពង្រីកសិទ្ធិអំណាចរបស់គ្រួសារ នៅក្នុងប្រទេសអាស៊ីខាងត្បូងមួយនេះ។

លោកស្រី Maryam វ័យ ៥០ឆ្នាំ ដែលជាអ្នកស្នងមរតកនយោបាយរបស់ឪពុក គឺជាស្ត្រីទី១ ដែលបានធ្វើជារដ្ឋមន្ត្រីប្រចាំរដ្ឋ Punjab ជាមុខតំណែងដែលត្រូវបានចាត់ទុកជាយូរមកហើយថា ជាឱកាសរីកចម្រើន ក្នុងធ្វើដំណើរឆ្ពោះទៅមុខ រហូតបានក្លាយជានាយករដ្ឋមន្ត្រីរបស់ប្រទេសនេះ។

លោកស្រីទទួលបានសំឡេងគាំទ្រចំនួន ២២០សំឡេង នៅក្នុងសភាប្រចាំរដ្ឋដែលមាន ៣៧១អាសនៈ ដោយប្រធានភាប្រចាំរដ្ឋ Punjab នេះ បានប្រាប់ថា លោកបានប្រកាសពីលទ្ធផលបោះឆ្នោតដែលមានការធ្វើពហិការ ដោយគណបក្សប្រឆាំង Sunni Ittehad Council ជាគណបក្សគាំទ្រដោយអតីតនាយករដ្ឋមន្ត្រីលោក Imran Khan ដែលត្រូវបានផ្ដន្ទាទោសឲ្យជាប់ពន្ធនាគារ។

លោក Khan និងសម្ព័ន្ធមិត្តរបស់លោក បានចោទប្រកាន់ថា ការបោះឆ្នោតជាតិ កាលពីថ្ងៃទី៨ ខែកុម្ភៈ ត្រូវបានរៀបចំឡើងប្រឆាំងនឹងពួកគេ ជាការចោទប្រកាន់ ដែលត្រូវបានគណៈកម្មាធិការរៀបចំការបោះឆ្នោតរបស់ប្រទេសបដិសេធ។

ដោយបន្ថែមថា ទ្វារបើកចំហជានិច្ច សម្រាប់ការភិភាក្សាជាមួយក្រុមអ្នកមានគំនិតផ្ទុយ នៅក្នុងសុន្ទរកថាទៅកាន់សភាបន្ទាប់ពីឈ្នះការបោះឆ្នោត លោកស្រី Maryam បាននិយាយថា៖ «ខ្ញុំមានការខកចិត្តដែលគណបក្សប្រឆាំងមិនមានវត្តមាននៅទីនេះ ដើម្បីជាផ្នែកនៃដំណើរការប្រជាធិបតេយ្យ»។

គួរបញ្ជាក់ថា លោកស្រី Maryam គឺជាសមាជិកទី៤ នៃគ្រួសាររបស់លោកស្រី ដែលបានក្លាយជារដ្ឋមន្ត្រីប្រចាំរដ្ឋ Punjab ដែលមាន ៥៣ភាគរយនៃប្រជាជនប៉ាគីស្ថានចំនួន ២៤១លាននាក់ និង ៦០ភាគរយនៃផលិតផលក្នុងស្រុកសរុប (GD) ៣៥០ពាន់លានដុល្លាររបស់ប្រទេស។ រដ្ឋក៏ជារដ្ឋកំណើតរបស់គ្រួសារលោក Sharif ផងដែរ៕