ភ្នំពេញ ៖ អ្នកនាំពាក្យការបរទេស និងសហប្រតិបត្តិការអន្តរជាតិ កាលពីម្សិលមិញនេះ បានចេញសេចក្តីបំភ្លឺ ដោយលើកឡើងថា ការសម្តែងមតិរបស់ប្រជាពលរដ្ឋមួយចំនួនជុំវិញដំណើរទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ទៅកាន់ប្រទេសម៉ាឡេស៊ី ត្រូវគោរពតាមគោលការណ៍ និងវិធានការច្បាប់របស់ប្រទេសសាម៉ី។

យោងតាមសេចក្តីបំភ្លឺ ចុះថ្ងៃថ្ងៃទី២៦ ខែកុម្ភៈ ឆ្នាំ២០២៤ម្សិលមិញនេះ ឯកឧត្តម ជុំ សុន្ទរី អ្នកនាំពាក្យក្រសួងការបរទេសបានចេញសេចក្តីបំភ្លឺ៣ចំណុច ឆ្លើយតបទៅនឹងការសាកសួររបស់អ្នកយកព័ត៌មានអំពីការអនុវត្តសិទ្ធិសម្ដែងមតិរបស់ប្រជាពលរដ្ឋខ្មែរមួយចំនួន ក្នុងឱកាសទស្សនកិច្ចផ្លូវការរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅប្រទេសម៉ាឡេស៊ី។

ការបំភ្លឺនេះ បានធ្វើឡើងបន្ទាប់ពីមានព័ត៌មានថា អាជ្ញាធរម៉ាឡេស៊ីព្រមានអំពីវិធានការចំពោះក្រុមប្រឆាំងកម្ពុជានៅក្នុងប្រទេសរបស់ខ្លួនពាក់ព័ន្ធនឹងការប៉ុនប៉ងធ្វើបាតុកម្មប្រឆាំងនឹងវត្តមានរបស់សម្តេចធិបតី ហ៊ុន ម៉ាណែត។

តាមរយៈសេចក្តីបំភ្លឺនេះ អ្នកនាំពាក្យក្រសួងការបរទេស អះអាងថា ជាគោលការណ៍នៃលទ្ធិប្រជាធិបតេយ្យ សិទ្ធិនៃការសម្ដែងមតិត្រូវស្ថិតក្នុងក្របខ័ណ្ឌនីតិរដ្ឋ។

អ្នកនាំពាក្យរូបនេះ បញ្ជាក់ថា កន្លងមកមានការអធិប្បាយ និងបកស្រាយជាច្រើនអំពីសិទ្ធិសម្ដែងមតិ ក្នុងឱកាសដំណើរទស្សនកិច្ចផ្លូវការរបស់សម្តេចធិបតីនាយករដ្ឋមន្ត្រីនៅប្រទេសម៉ាឡេស៊ី តែពុំមានការនិយាយអំពីច្បាប់ និងគោលការណ៍នានាឡើយ។ ជុំវិញបញ្ហានេះ អ្នកនាំពាក្យក្រសួងការបរទេស បានបញ្ជាក់ដូចតទៅថា៖

១៖ «ការមិនជ្រៀតជ្រែកចូលកិច្ចការផ្ទៃក្នុងរបស់រដ្ឋសមាជិកអាស៊ាន» គឺជាគោលការណ៍មួយ ក្នុងចំណោមគោលការណ៍នានា ដែលមានចែងក្នុងជំពូក១ មាត្រា២ នៃធម្មនុញ្ញអាស៊ាន។ ក្នុងនោះ កម្ពុជា និងម៉ាឡេស៊ី មិនត្រឹមតែមានទំនាក់ទំនងមិត្តភាព និងកិច្ចសហប្រតិបត្តិការដ៏ល្អប៉ុណ្ណោះទេ តែក៏ជាប្រទេសសមាជិកអាស៊ានដែលត្រូវគោរពយ៉ាងពេញលេញចំពោះធម្មនុញ្ញអាស៊ាន។

២៖ ជាគោលការណ៍នៅក្នុងការអនុវត្តជាអន្តរជាតិ ប្រទេសម្ចាស់ផ្ទះមានកាតព្វកិច្ចធានាសេចក្តីថ្លៃថ្នូរ សន្តិសុខ សុវត្ថិភាព និងភាពរលូន នៃដំណើរទស្សនកិច្ច/ការអញ្ជើញចូលរួមកិច្ចប្រជុំនានារបស់ឥស្សរជនជាន់ខ្ពស់នៃបណ្តារដ្ឋ។ ជានេះទៅទៀត ចំពោះការចាត់វិធានការនានារបស់អាជ្ញាធរមានសមត្ថកិច្ចម៉ាឡេស៊ី គឺសំដៅធានាការគោរពយ៉ាងត្រឹមត្រូវចំពោះគោលការណ៍ដែលបាន លើកឡើងក្នុងចំណុចទី១ និងទី២នេះ។

៣៖ ជនបរទេស ដោយរាប់បញ្ចូលទាំងអ្នកការទូតដែលមានអភ័យឯកសិទ្ធិផងនោះ មានកាតព្វកិច្ចគោរពប្រណិប័តទៅតាមច្បាប់នៃប្រទេសដែលខ្លួនរស់នៅ ឬតាំងនៅ ដែលប្រការនេះការអនុវត្ត ក៏ដូចជាសិទ្ធិសម្ដែងមតិ គឺត្រូវសមស្របទៅតាមច្បាប់របស់ប្រទេសម៉ាឡេស៊ី៕ ដោយ ៖ ឧត្ដម