លោកស្រី ជ័យ ច័ន្ទកិត្យា អគ្គនាយករង បច្ចេកទេសវប្បធម៌ នៃក្រសួងវប្បធម៌ និងវិចិត្រសិល្បៈ បាន​ថ្លែង​ប្រាប់BTV ព័ត៌មាន នាថ្ងៃទី២៧ ខែកុម្ភៈ ឆ្នាំ២០២៤នេះ ថា មកដល់ពេលនេះ មានយុវជន១៨៥នាក់ មកពី​គ្រួសារក្រីក្រ និងងាយរងហានិភ័យ បានមកទទួល​ការ​បណ្តុះបណ្តាល​លើ​ជំនាញ​វិជ្ជាជីវៈ​មរតក​ដូនតា។

លោកស្រី ជ័យ ច័ន្ទកិត្យា បន្តថា បច្ចុប្បន្នក្នុងដំណាក់កាលដំបូង នៃវគ្គទី១ ដែលក្រសួងវប្បធម៌ និង​វិចិត្រ​សិល្បៈ​បាន​រៀបចំឡើងកាលពីដើមកុម្ភៈ ឆ្នាំ២០២៤មកនេះ បានកំណត់ និង​ជ្រើសរើស​យុវជន​មក​ពី​គ្រួសារ​ក្រីក្រ​សរុបចំនួន ៣០០នាក់ ដើម្បីចូលមកសិក្សាលើជំនាញវិជ្ជាជីវៈមរតកដូនតា ហើយ​ក្នុង​មួយ​ថ្នាក់ មិនឲ្យលើសពី១៥នាក់នោះទេ ដោយសិក្សាមានរយៈពេល១២ខែ សម្រាប់ជំនាញ​វិជ្ជាជីវៈ​មរតក​ដូនតា គឺយើងកំពុងដំណើរការបណ្តុះបណ្តាល ចំនួន១១ទីតាំង និង១៣ថ្នាក់ នៅខេត្តទាំង៦។ ទន្ទឹម​នឹង​នោះ​ក្រសួង ក៏កំពុងបន្តទទួលយុវជនមកពីគ្រួសារក្រីក្រ និងងាយរងហានិភ័យ ដើម្បីមកចាប់​យក​ជំនាញ​វិជ្ជា​ជីវៈ​មរតកដូនតាបន្ថែមទៀតផងដែរ។

សូមបញ្ជាក់ផងដែរថា នៅដើមខែកុម្ភះ ឆ្នាំ២០២៤នេះ ក្រសួងវប្បធម៌ និងវិចិត្រសិល្បៈ កំពុង​ដំណើរ​ការ​សកម្មភាព​កម្ម​វិធីបណ្តុះបណ្តាលជំនាញវិជ្ជាជីវៈមរតកដូនតា ដែលមានចំនួន១៣ទីតាំង ក្នុងរាជធានី-ខេត្ត​ទាំង៨។ រៀនដោយមិនបង់ថ្លៃលើជំនាញ៖ ខ្មុកស្មាច់, ចម្លាក់ប្រាក់/ស្ពាន់, ចម្លាក់ស្បែក, ចម្លាក់ថ្ម, តម្បាញ​ក្រមាត្រុំ, ស្មូនឆ្នាំង, ផលិតឧបករណ៍ភ្លេង, តម្បាញសូត្រ, គំនូរពណ៌, គំនូរបុរាណ និងចម្លាក់​ស្មិត​។ ចំពោះសិស្សមកពីគ្រួសារក្រីក្រ (មានបណ្ណ) និងគ្រួសារងាយរងហានិភ័យ (មានបណ្ណ) នឹងទ​ទួល​បាន​ប្រាក់​ឧបត្ថម្ភចំនួន ២៨ម៉ឺនរៀល ក្នុងមួយខែ តែត្រូវបំពេញលក្ខខណ្ឌសិក្សាឲ្យបានត្រឹមត្រូវ។ ហើយ​ការ​បណ្តុះ​បណ្តាលវិជ្ជាជីវៈមរតកដូនតានេះ គឺជាកម្មវិធីអាទិភាពទាំង៦ចំណុច របស់រាជរដ្ឋាភិបាល បាន​ផ្តល់​អាទិភាព​មកក្រសួងវប្បធម៌ និងវិចិត្រសិល្បៈ រៀបចំកម្មវិធី​បណ្តុះបណ្តាល​ជំនាញ​វិជ្ជាជីវៈ​មរតក​ដូនតា ដែលក្នុងកម្មវិធីនេះ រាជរដ្ឋាភិបាលបានអនុញ្ញាតឲ្យ២% ទៅ៤% នៃចំនួន១លាន៥សែននាក់៕អត្ថបទ រដ្ឋា