អាហ្វហ្គានីស្ថាន៖ ក្រុមតាលីបង់បានចូលទៅក្នុងទីក្រុងដ៏សំខាន់មួយ នៅភាគខាងលិចប្រទេសអាហ្វហ្គានីស្ថាន ខណៈដែលពួកគេបន្តដំណើរទៅមុខយ៉ាងលឿន មុនពេលកងទ័ពណាតូចាកចេញ។ អភិបាលក្រុងបានប្រាប់សារព័ត៌មាន BBC ថា ក្រុមមន្ត្រីរដ្ឋាភិបាលត្រូវបានផ្លាស់ទៅកាន់មូលដ្ឋានទ័ពយោធាដែលនៅក្បែរនោះ ខណៈក្រុមសកម្មប្រយុទ្ធឆ្ពោះទៅកាន់ភាគកណ្ដាលទីក្រុង Qala-e-Naw។
ប៉ុន្តែក្រុមមន្ត្រីក្នុងតំបន់ និងទាហានការពារជាតិក្រោយមកបាននិយាយថា ក្រុមតាលីបង់ត្រូវបានបណ្ដេញចេញពីអាគាររដ្ឋាភិបាលមួយចំនួន ហើយទាហានបានបោសសម្អាតភាគច្រើននៃទីក្រុងនេះ។ ក្រុមតាលីបង់កំពុងដណ្ដើមយកតំបន់នានានៅក្នុងប្រទេសនេះ ខណៈកងទ័ពអាមេរិក និងសម្ព័ន្ធមិត្តចាកចេញ។ កម្លាំងបរទេសដែលនៅសេសសល់ភាគច្រើននៅក្នុងប្រទេសអាហ្វហ្គានីស្ថាន បានចាកចេញមុនថ្ងៃផុតកំណត់ថ្ងៃទី១១ ខែកញ្ញាដោយទុកឱ្យយោធាអាហ្វហ្គានីស្ថានទទួលបន្ទុកផ្នែកសន្តិសុខតែម្នាក់ឯង។
ក្រុមមន្ត្រីបាននិយាយថា កងកម្លាំងសន្តិសុខបានបើកការវាយប្រហារតាមអាកាស ដើម្បីបោសសំអាតពួកសកម្មប្រយុទ្ធចេញពីទីក្រុង Qala-e-Naw នៅក្នុងខេត្ត Badghis ភាគខាងលិច និងកងកម្លាំងពិសេសត្រូវបានប្រើដើម្បីបណ្ដេញក្រុមបះបោរ ចេញពីអគាររដ្ឋាភិបាលដែលពួកគេបានកាន់កាប់មួយរយៈពេលខ្លី។ វីដេអូដែលត្រូវបានផ្សព្វផ្សាយយ៉ាងទូលំទូលាយនៅលើបណ្ដាញសង្គម បានបង្ហាញពីយុទ្ធជនតាលីបង់បានធ្វើដំណើរយ៉ាងលឿន ចូលទៅក្នុងខេត្តនេះតាមទោចក្រយានយន្តនៅព្រឹកថ្ងៃដដែល។ ប្រភពក្នុងស្រុកបានប្រាប់ BBC ថា ពួកតាលីបង់បានទៅកាន់ពន្ធនាគារទីក្រុងនេះ ហើយបានដោះលែងអ្នកទោសប្រហែល ៤០០នាក់រួមទាំងអ្នកប្រយុទ្ធរបស់ខ្លួនជាង ១០០នាក់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
