រដ្ឋមន្ត្រីរបស់កោះតៃវ៉ាន់បាននិយាយនៅថ្ងៃអង្គារ (២៧ កុម្ភៈ) នេះថានាវាឆ្មាំល្បាតឆ្នេរចិនចំនួន ៥ គ្រឿងបានចូលដែនទឹកហាមឃាត់ ឬដាក់កម្រិត នៅជុំវិញកោះជួរមុខ គីនមិន (Kinmen) របស់តៃវ៉ាន់កាលពីថ្ងៃចន្ទ ប៉ុន្តែបានចាកចេញភ្លាមៗបន្ទាប់ពីត្រូវបានព្រមាន។

ឆ្មាំល្បាតឆ្នេររបស់ប្រទេសចិន ក្នុងខែនេះបានចាប់ផ្តើមការល្បាតជាប្រចាំនៅជុំវិញកោះ គីនមិន ដែលគ្រប់គ្រងដោយកោះតៃវ៉ាន់ នៅជិតឆ្នេរសមុទ្ររបស់ប្រទេសចិន បន្ទាប់ពីជនជាតិចិនពីរនាក់បានស្លាប់ក្នុងពេលព្យាយាមរត់គេចពីឆ្មាំល្បាតឆ្នេរតៃវ៉ាន់ បន្ទាប់ពីទូករបស់ពួកគេបានចូលទៅក្នុងដែនទឹកហាមឃាត់។

លោកស្រី ខ្វ័ន ពីលីង (Kuan Bi-ling) ប្រធានក្រុមប្រឹក្សាកិច្ចការសមុទ្ររបស់កោះតៃវ៉ាន់ ដែលគ្រប់គ្រងឆ្មាំល្បាតឆ្នេរបានប្រាប់អ្នកសារព័ត៌មាននៅសភាថា នាវាចិនបានចាកចេញពីតំបន់នោះភ្លាមៗបន្ទាប់ពីឆ្មាំល្បាតឆ្នេរតៃវ៉ាន់ បានប្រាប់ពួកគេឱ្យចាកចេញ។

កោះតៃវ៉ាន់ ដែលចិនអះអាងថាជាទឹកដីរបស់ខ្លួនបើទោះបីជាកោះនេះបដិសេធក៏ដោយ មានការប្រុងប្រយ័ត្នចំពោះកិច្ចខិតខំប្រឹងប្រែងរបស់ទីក្រុងប៉េកាំង ដើម្បីបង្កើនសម្ពាធលើទីក្រុងតៃប៉ិ បន្ទាប់ពីការបោះឆ្នោតកាលពីខែមុន ដែលមេដឹកនាំជាប់ឆ្នោតថ្មី លោក ឡៃ ឈីងតឺ (Lai Ching-te) ត្រូវទីក្រុងប៉េកាំង ចាត់ទុកជាអ្នកផ្ដាច់ខ្លួនដ៏គ្រោះថ្នាក់៕