អង្គការឃ្លាំមើលសិទិ្ធមនុស្ស (HRW)នៅថ្ងៃចន្ទ បានចោទប្រកាន់អ៊ីស្រាអែលថា ខកខានមិនបានអនុវត្តតាមសេចក្តីសម្រេចរបស់តុលាការយុត្តិធម៌អន្តរជាតិ (ICJ)ដែលពាក់ព័ន្ធនឹងករណីប្រល័យពូជសាសន៍ ដែលបានលើកឡើងដោយអាហ្វ្រិកខាងត្បូង។

អង្គការ HRW បាននិយាយថា អ៊ីស្រាអែលមិនបានធ្វើតាមសេចក្តីសម្រេចរបស់តុលាការ ICJ កាលពីថ្ងៃទី២៦ ខែមករា ដើម្បីចាត់វិធានការជាបន្ទាន់ និងមានប្រសិទ្ធភាព ក្នុងការផ្តល់សេវាមូលដ្ឋានដែលត្រូវការជាបន្ទាន់ និងជំនួយមនុស្ស ដល់តំបន់ហ្កាហ្សា។

លោក Omar Shakir នាយកប្រតិបត្តិ HRW ជាជនជាតិអ៊ីស្រាអែល និងប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយថា៖«រដ្ឋាភិបាលអ៊ីស្រាអែល កំពុងបង្អត់អាហារដល់ប្រជាជនប៉ាឡេស្ទីនចំនួន ២,៣លាននាក់នៅតំបន់ហ្កាហ្សា ដោយធ្វើឲ្យពួកគេស្ថិតក្នុងគ្រោះថ្នាក់ជាងមុនពេលមានសេចក្តីសម្រេច របស់តុលាការពិភពលោកនេះ ។

«រដ្ឋាភិបាលអ៊ីស្រាអែល បានអើពើនឹងសេចក្តីសម្រេចរបស់តុលាការនេះទេ ហើយតាមរបៀបខ្លះ ថែមទាំងបានបង្កើនការគាបសង្កត់របស់ខ្លួន រួមទាំងការទប់ស្កាត់ជំនួយសង្គ្រោះជីវិតបន្ថែមទៀត»។

អង្គការ HRW បាននិយាយថា ទិន្នន័យដែលចេញផ្សាយដោយការិយាល័យសម្របសម្រួលកិច្ចការមនុស្សធម៌ និងជំនួយរបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ជិតបូព៌ា បានបង្ហាញថា ជាមធ្យមប្រចាំថ្ងៃ រថយប្តដឹកទំនិញចូលតំបន់ហ្កាហ្សា ដើម្បីផ្តល់ជំនួយ អាហារ និងថ្នាំ បានធ្លាក់ចុះដល់ ៩៣គ្រឿង កាលពីថ្ងៃទី២៧ ខែមករា។ ភ្លាមៗបន្ទាប់ពីមានសេចក្តីសម្រេចនោះ ធ្លាក់ចុះពី១៤៧គ្រឿងពីថ្ងៃទី ១ ខែមករា ដល់ថ្ងៃទី ២៦ ខែមករា និងមានប្រហែល ៥០០គ្រឿង មុនពេលសង្រ្គាម ចាប់ផ្តើម នៅថ្ងៃទី៧ ខែតុលា។