ម្តាយប៉ាឡេស្ទីនជម្លៀសខ្លួន Warda Mattar ស្នាក់នៅក្នុងជំរំជនភៀសខ្លួន Al-Nuseirat ស្ថិតនៅភាគខាងជើងទីក្រុង Deir al-Balah បានបំបៅទារកទើបកើតអាយុ ២ខែរបស់គាត់ជាមួយនឹងផ្លៃលម៉ើដែលរុំក្នុងស្បៃ ដោយសារតែគ្មានទឹកដោះគោនៅទីនោះ ។

អ្នកស្រី Mattar និយាយថា កូនប្រុសរបស់ខ្ញុំគិតថាមានទឹកដោះគោបៅ ពេលកើត ដែលជាទឹកដោះគោធម្មជាតិ ឬទឹកដោះគោកំប៉ុង ប៉ុន្តែខ្ញុំមិនអាចឲ្យកូនប្រុសខ្ញុំបៅទឹកដោះគោបានទេ ដោយសារតែគ្មានទឹកដោះគោនោះឡើយ នៅក្នុងតំបន់ហ្កាហ្សា ។

អ្នកស្រីបន្តថា ខ្ញុំរកបានតែផ្លែលម៉ើប៉ុណ្ណោះ ដើម្បីធ្វើឲ្យកូនប្រុសរបស់ខ្ញុំបាត់យំ ។

កង្វះខាតស្បៀងអាហារ បានក្លាយជាបញ្ហាធ្ងន់ធ្ងរមួយនៅទូទាំងតំបន់បិទច្រកប៉ាឡេស្ទីនមួយនេះ ចាប់តាំងពីការចាប់ផ្តើមសង្រ្គាមកាលពីថ្ងៃទី ៧ ខែតុលា រវាងអ៊ីស្រាអែល និងក្រុមហាម៉ាស់ ប៉ុន្តែបញ្ហារឹតតែធ្ងន់ធ្ងរជាងនេះ នៅតំបន់ភាគខាងជើងហ្កាហ្សា ជាទីដែលការចែកចាយជំនួយកម្រទៅដល់ ។

ខណៈពេលនោះដែរ កងទ័ពអ៊ីស្រាអែល បានបង្ហាញគណៈរដ្ឋមន្ត្រីសង្គ្រាមជាមួយនឹងផែនការវាយប្រហារ និងផែនការជម្លៀសជនស៊ីវិលនៅក្នុងទីក្រុង Rafah ភាគខាងត្បូងតំបន់ហ្កាហ្សា ។ 

ការប្រកាសនេះបានធ្វើឡើង ស្របពេលមានការអំពាវនាវពីអន្តរជាតិជំរុញអ៊ីស្រាអែល មិនឲ្យបើកប្រតិបត្តិការជើងគោកនៅទីក្រុង Rafah ជាទីដែលមនុស្សជាងមួយលាននាក់ កំពុងស្វែងរកទីជម្រកពីការទម្លាក់គ្រាប់បែករបស់អ៊ីស្រាអែល នៅកន្លែងផ្សេងទៀត ៕