ឈ្មួញកណ្តាលដែលជួលនាវាមួយគ្រឿងនេះ និយាយកាលពីថ្ងៃចន្ទថា ក្រុមម្ចាស់នាវាដឹកទំនិញ Rubymar ដែលរងការវាយប្រហារដោយមីស៊ីលក្រុមឧទ្ទាមហ៊ូធី កាលពីថ្ងៃទី ១៨ ខែកុម្ភៈ នៅតំបន់ភាគខាងត្បូងសមុទ្រក្រហម មានគម្រោងសណ្តោងនាវាមួយគ្រឿងនេះ ទៅកាន់អារ៉ាប៊ីសាអូឌីត ពេលណាដែលវាអាចជួសជុលបាន ។

ប្រភពដឹកជញ្ជូន បានឲ្យដឹងថា អាកាសធាតុនៅទីនោះ កាន់តែអាក្រក់ជាងមុន ក្នុងរយៈពេលប៉ុន្មានថ្ងៃចុងក្រោយនេះ ជាមួយនឹងស្ថានភាពខ្យល់បក់ខ្លាំង ។

រូបភាពវីដេអូឃ្លីបពីទូរទស្សន៍ Al-Joumhouriya ឃើញនាវាលិចពាក់កណ្តាលខ្លួនកាលពីថ្ងៃចន្ទ ។

យោងតាមសម្តីរបស់លោក Roy Khoury គឺជាប្រធានប្រតិបត្តិក្រុមហ៊ុននាវាចរណ៍ Blue Fleet Group ដែលមានមូលដ្ឋាននៅប្រទេសលីបង់ បានឲ្យដឹងថា បន្ទប់ម៉ាស៊ីននាវា និងបន្ទប់លេខ ៥ ចូលទឹកពេញ ។

លោក Khoury និយាយថា ពួកគេកំពុងរកមើលនាំនាវាជួសជុលទៅបិទកន្លែងធ្លុះធ្លាយដោយសារមីស៊ីលរបស់ក្រុមឧទ្ទាមហ៊ូទី ។

លោក Khoury និយាយប្រាប់ទីភ្នាក់ងារព័ត៌មានរ៉យទ័រតាមអ៊ីម៉ែលថា មាននូវការលិចប្រេងតិចតួចផងដែរ ហើយនាវាមួយគ្រឿងនេះ ដឹកជីកសិកម្មទម្ងន់ ២២.០០០តោន ។

ដោយឡែក ប្រភពកំពង់ផែយេម៉ែន និយាយថា នាវាមួយគ្រឿងនេះ នៅឆ្ងាយពីកំពង់ផែក្រុងអាដែន ស្ថិតនៅភាគខាងត្បូងប្រទេសយេម៉ែន ហើយកំពង់ផែ ពុំទទួលបានការស្នើសុំឲ្យជួយសណ្តោងនាវាមួយគ្រឿងនេះឡើយ ។

ប្រភពដាច់ដោយឡែកមួយទៀតពីរដ្ឋាភិបាលយេម៉ែន បានឲ្យដឹងថា ក្រុមសង្កេតការណ៍ បានធ្វើដំណើរទៅកាន់នាវា Rubymar កាលពីថ្ងៃចន្ទ ហើយពួកគេបានអង្កេតប្រេងអណ្តែតលើទឹកជុំវិញនាវា និងឃើញផ្នែកខ្លះរបស់នាវា បានលិច ៕