ភ្នំពេញ ៖ គណៈកម្មាធិការជាតិរៀបចំការបោះឆ្នោត(គ.ជ.ប) នៅរសៀលថ្ងៃទី២៧ ខែកុម្ភៈនេះ បានធ្វើការត្រួតពិនិត្យ និងផ្ទៀងផ្ទាត់ឡើងវិញ ដើម្បីបញ្ជាក់ពីភាពត្រឹមត្រូវនូវលទ្ធផលការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤។ ការពិនិត្យ និងផ្ទៀងផ្ទាត់នេះ រៀបចំនៅទីស្តីការ គ.ជ.ប រាជធានីភ្នំពេញ ដោយមានការចូលរួមពីតំណាងគណបក្សនយោបាយ អង្គការសង្គមស៊ីវិល និងក្រុមអ្នកសារព័ត៌មានជាដើម។ 

បើតាមឯកឧត្តម តុប ឫទ្ធី អគ្គនាយកនៃអគ្គនាយកដ្ឋានសេវាកម្មច្បាប់ និងបច្ចេកទេស នៃគណៈកម្មាធិការជាតិរៀបចំការបោះឆ្នោត បានឱ្យដឹងថា ក្រោយបញ្ចប់ដំណើរពិនិត្យ ផ្ទៀងផ្ទាត់លទ្ធផលបោះឆ្នោតព្រឹទ្ធសភាម្តងទៀត នៅពេលនេះ គឺដូចទៅនឹងលទ្ធផលមុន ដែលទទួលបានពីគ្រប់គណៈកម្មការរៀបចំការបោះឆ្នោតរាជធានី-ខេត្តបញ្ចូលមកគ.ជ.ប។ បន្ទាប់ពីធ្វើការពិនិត្យរួចរាល់ គ.ជ.ប នឹងធ្វើការប្រកាសលទ្ធផលបណ្ដោះអាសន្ននៅក្នុងសប្តាហ៍នេះ។ លើសពីនេះ ឯកឧត្តមបន្តថា ក្រោយប្រកាសលទ្ធផលបណ្តោះអាសន្ន គ.ជ.ប ទុករយៈពេល៧២ម៉ោង ឱ្យគណបក្សនយោបាយអាចប្តឹងតវ៉ាមក គ.ជ.ប ក្នុងករណីរកឃើញភាពមិនប្រក្រតីណាមួយបានកើតឡើងក្នុងដំណើរការបោះឆ្នោត។

​យោងតាមរបាយការណ៍របស់គណៈកម្មាធិការជាតិរៀបចំការបោះឆ្នោត បានឱ្យដឹងថា កាលពីថ្ងៃទី២៥ ខែកុម្ភៈ ឆ្នាំ២០២៤ អ្នកទៅបោះឆ្នោតជ្រើសតាំងសមាជិកព្រឹទ្ធសភា មានចំនួនសរុប១១,៧៣០នាក់ ដែលស្មើនឹង៩៩,៨៦ភាគរយ នៃចំនួនអង្គបោះឆ្នោតសររុប។ ជាលទ្ធផលបឋម គណបក្សប្រជាជនកម្ពុជាទទួលអាសនៈច្រើនលើសលប់ នៅតាមការិយាល័យទាំង៣៣ នៃភូមិភាគទាំង៨ ។

អត្ថបទ៖ទូច សោភ័ណ​