រដ្ឋមន្ត្រីពាណិជ្ជកម្មត្រៀមសម្រាប់ការភិភាក្សាគ្នាដ៏តានតឹង នាថ្ងៃអង្គារ (ទី២៧ ខែកុម្ភៈ) នេះ នៅឯកិច្ចប្រជុំរបស់អង្គការពាណិជ្ជកម្មពិភពលោក (WTO) ក្នុងទីក្រុង Abu Dhabi (អាប៊ូដាប៊ី) ដោយបញ្ហាជលផល និងកសិកម្ម គឺជារបៀបវារៈដ៏សំខាន់ជាងគេ។

កិច្ចពិភាក្សាបិទទ្វារនេះ នឹងប្រព្រឹត្តទៅនៅថ្ងៃទី២ នៃសន្និសីទថ្នាក់រដ្ឋមន្ត្រីលើកទី១៣ របស់ WTO ដែលគ្រោងនឹងដំណើរការរហូតដល់ថ្ងៃទី២៩ ខែកុម្ភៈ ប៉ុន្តែអាចមានការបន្ថែមពេលវេលា ក្នុងពេលដែលមានការមិនចុះសម្រុងគ្នា។

យ៉ាងណាក្ដី កិច្ចប្រជុំនេះមានក្តីសង្ឃឹមតិចតួចណាស់ ក្នុងការឈានដល់ដំណាក់កាលដ៏សំខាន់មួយយ៉ាងល្អប្រសើរនោះ ដ្បិតច្បាប់របស់ WTO តម្រូវឲ្យមានការឯកគ្នាទាំងស្រុង ក្នុងចំណោមរដ្ឋសមាជិកទាំង១៦៤។ តែជំហានរីកចម្រើនអាចត្រូវបានធ្វើឡើង ក្នុងកិច្ចព្រមព្រៀងកម្រិតសកលថ្មីមួយ ស្តីពីការឧបត្ថម្ភធនលើវិស័យជលផលដែលបញ្ចូលបន្ថែមទឹកប្រាក់រាប់ពាន់លានដុល្លារ ក្នុង ១ឆ្នាំៗ។

បន្ទាប់ពីកិច្ចព្រមព្រៀងឆ្នាំ២០២២ ដែលហាមប្រាមមិនឲ្យមានការឧបត្ថម្ភធនដែលរួមចំណែកដល់ការនេសាទខុសច្បាប់ មិនបានប្រកាស និងមិនមានការត្រួតពិនិត្យ WTO សង្ឃឹមថា នឹងបញ្ចប់កញ្ចប់ទី២ ផ្តោតលើការឧបត្ថម្ភធនដែលជំរុញការនេសាទលើសចំណុះ និងការនេសាទច្រើនហួសហេតុ។

ប្រភពការទូតម្នាក់បានឲ្យដឹងថា៖ «យើងជិតសម្រេចបាន។ វាពិតជាអាចធ្វើឲ្យលេចចេញជារូបរាងយ៉ាងពិតប្រាកដ»។ ដោយហៅកិច្ចព្រមព្រៀងដ៏មានសក្តានុពលថា ជា «លទ្ធផលល្អណាស់» ប្រភពនោះបានប្រាប់ទីភ្នាក់ងារព័ត៌មាន Agence France-Presse ក្នុងលក្ខខណ្ឌមិនបញ្ចេញឈ្មោះថា៖ «ការជំរុញចុងក្រោយ ត្រូវការការសម្របសម្រួលបន្តិចបន្តួច ពោលគឺត្រូវការឆន្ទៈនយោបាយបន្តិចបន្តួច»។

គួរបញ្ជាក់ថា កិច្ចព្រមព្រៀងឆ្នាំ២០២២ មិនទាន់ចូលជាធរមាននៅឡើយទេ ដោយសារមិនមានប្រទេសគ្រប់គ្រាន់ផ្តល់សច្ចាប័ន៕