រដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តម ប៉េង ពោធិ៍នា បានឱ្យដឹងថា ផ្លូវជាតិ និងផ្លូវតាមបណ្ដាខេត្តជាង ២ម៉ឺនគីឡូម៉ែត្រ ត្រូវបានសាងសង់រួចរាល់ក្នុងឆ្នាំ២០២៣ ដែលផ្លូវទាំងនោះមានទាំងផ្លូវក្រាលកៅស៊ូ និងបេតុងជាង១ម៉ឺនគីឡូម៉ែត្រ។
មានប្រសាសន៍ក្នុងឱកាសអញ្ជើញជាអធិបតីក្នុងពិធីបើកសន្និបាតបូកសរុបលទ្ធផលការងារ ឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការនិងដឹកជញ្ជូន ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ថ្លែងថា ការរៀបចំសន្និបាតប្រចាំឆ្នាំធ្វើឡើងដើម្បីពិនិត្យ និងវាយ តម្លៃលើសមិទ្ធផលការងារដែលក្រសួងសម្រេចបានក្នុងរយៈពេលមួយឆ្នាំកន្លងទៅ ក៏ដូចជាពិភាក្សាពីបញ្ហាប្រឈមនានា និងលើកទិសដៅការងារសម្រាប់ឆ្នាំបន្ទាប់ ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្នុងបុព្វហេតុចូលរួមអភិវឌ្ឍសង្គម-សេដ្ឋកិច្ច។
ឯកឧត្តមមានប្រសាសន៍ថា ជារៀងរាល់ឆ្នាំក្រសួងតែងកំណត់នូវប្រធាន បទសម្រាប់សន្និបាត ដែលឆ្លើយតបជាមួយនឹងអាទិភាព និងតម្រូវការជាក់ស្តែង ដែលស្របតាមគោលនយោបាយ និងចក្ខុវិស័យរបស់រាជរដ្ឋាភិបាល។ ដោយឡែកសម្រាប់ប្រធានបទក្នុងឆ្នាំនេះក្រសួងបានជ្រើសរើសយកប្រធានបទ «ពង្រឹងការអភិវឌ្ឍធនធានមនុស្ស គុណភាពសំណង់ហេដ្ឋារចនាសម្ព័ន្ធ ការរៀបចំច្បាប់-បទដ្ឋានគតិយុត្ត ការផ្តល់ សេវា និងការប្រើប្រាស់បច្ចេកវិទ្យានិងឌីជីថល»។
ក្នុងនាឱកាសសន្និបាតនេះឯកឧត្តមរដ្ឋមន្រ្ដីបានគូសបញ្ជាក់ថា គិតត្រឹមឆ្នាំ២០២៣កន្លងទៅក្រសួងបានស្ថាបនា និងសាងសង់ផ្លូវជាតិកម្រិត១ និងកម្រិត២ ដែលមានទាំងផ្លូវជាតិ និងផ្លូវខេត្តបានចំនួន ៨៥០ ខ្សែ មានប្រវែងជាង ២ ម៉ឺនគីឡូម៉ែត្រហើយបានក្រាលកៅស៊ូ និងបេតុងប្រវែងជាង ១ម៉ឺនគីឡូម៉ែត្រ ស្មើនឹង ៥៦,៣៨% នៃប្រវែងផ្លូវសរុប។
ជាមួយនឹងវឌ្ឍនភាពខាងលើ ឯកឧត្តម បានបង្ហាញឆន្ទះមុះមុតអនុវត្តឱ្យស្របតាមចក្ខុវិស័យរបស់រាជរដ្ឋាភិបាល ក្នុងនីតិកាលទី៧ នៃរដ្ឋសភា ក្រោមការដឹកនាំដ៏ស្វាហាប់ និងឈ្លាសវៃរបស់សម្តេចមហាបវេធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលកំពុងបន្តដឹកនាំប្រទេសកម្ពុជាឱ្យមានវឌ្ឍនភាព និងបង្កើតសមិទ្ធផលថ្មីបន្ថែមទៀត តាមគោលការណ៍ រក្សាចាស់ ពង្រីកថ្មី-ដោយពង្រឹងប្រសិទ្ធភាព និងពង្រីកវិសាលភាពនៃការអនុវត្ត តាមរយៈការដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយរួមបញ្ចូលនូវកម្មវិធីគោលនយោបាយ និងវិធានការគន្លឹះសំខាន់ៗ ដែលបានកំណត់ទិសដៅ និង អាទិភាពនានាក្នុងការដឹកនាំប្រទេស៕ អត្ថបទ៖ សេក ឧត្តម