នៅក្នុងឆ្នាំ២០២៤នេះ អាជ្ញាធរខណ្ឌដូនពេញ នៃរាជធានីភ្នំពេញ ក្នុងចំណោមទីក្រុងស្អាតចំនួនបីរបស់កម្ពុជា គឺបានទទួលពានរង្វាន់ជ័យលាភីទីក្រុងទេសចរណ៍ឆ្នើមនៅក្នុងតំបន់អាស៊ាន សម្រាប់ឆ្នាំ២០២៤ ដល់ឆ្នាំ២០២៦។ ខណៈដើម្បីរក្សាកិត្តិនាមជាទីក្រុងស្អាតកម្រិតថ្នាក់ជាតិ និងតំបន់ រដ្ឋបាលខណ្ឌដូនពេញ និងអាជ្ញាធរតាមសង្កាត់ ប្តេជ្ញាបង្កើនការអភិវឌ្ឍ ទីក្រុង សម្អាតបរិស្ថាន និងទាក់ទាញទេសចរជាតិ អន្តរជាតិទស្សនាឱ្យបានកាន់តែច្រើនថែមទៀត។
លោក ជិត ណារិទ្ធ អនុប្រធានការិយាល័យសេដ្ឋកិច្ច និងអភិវឌ្ឍន៍សហគមន៍ខណ្ឌដូនពេញ ថ្លែងប្រាប់ BTV នៅថ្ងៃទី២៨ ខែកុម្ភៈនេះថា អនុវត្តតាមសារលិខិតទិវាជាតិទីក្រុងស្អាត លើកទី១២ ឆ្នាំ២០២៤ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រដ្ឋបាលខណ្ឌដូនពេញ និងបណ្តាអាជ្ញាធរមូលដ្ឋានតាមសង្កាត់នានាបានបង្កើតសកម្មភាពចូលរួមប្រឡងប្រណាំងទីក្រុងស្អាត រមណីយដ្ឋានស្អាត និងពង្រឹងវិធានការអនុវត្តគោលនយោបាយភូមិឃុំមានសុវត្ថិភាពឲ្យបានខ្លាំងក្លាថែមទៀត ដើម្បីរក្សាកិត្តិនាម ទីក្រុងស្អាតថ្នាក់ជាតិ ថ្នាក់តំបន់នៅក្នុងអាណត្តិបន្តបន្ទាប់ទៀត និងបង្កើនភាពទាក់ទាញទេសចរជាតិ អន្តរជាតិមកស្នាក់នៅ និងលេងកម្សាន្តឲ្យមានភាពកក់ក្តៅបំផុត។
ទេសចរជាតិអន្តរជាតបានថ្លែងថា បច្ចុប្បន្ននៅរាជធានីភ្នំពេញ ជាពិសេសគោលដៅទេសចរណ៍នៅក្នុងខណ្ឌដូនពេញ គឺមានរមណីយដ្ឋានទេសចរណ៍ វប្បធម៌ច្រើន ហើយជាពិសេសនោះគឺមានសួនតាមមាត់ទន្លេស្អាត និងគ្មានសំរាម។
សារលិខិតទិវាជាតិទីក្រុងស្អាត២៧ កុម្ភៈ លើកទី១២ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានអំពាវនាវដល់មហាជនគ្រប់មជ្ឈដ្ឋាន អាជ្ញាធរមូលដ្ឋានគ្រប់ជាន់ថ្នាក់ ចូលរួមអនុវត្តយុទ្ធនាការ ចលនាប្រឡងប្រណំាង ទីក្រុងស្អាត រមណីយដ្ឋានស្អាត សេវាបដិសណ្ឋារកិច្ចល្អ ដើម្បីឲ្យកម្ពុជាក្លាយជាគោលដៅទេសចរណ៍ប្រកបដោយគុណភាព ចីរភាពស្អាត និងបៃតងភាពទាក់ទាញខ្ពស់នៃភ្ញៀវទេសចរជាតិអន្តរជាតិ និងសក្តិសមកិត្តិនាម កម្ពុជាព្រះរាជាណាចក្រអច្ឆរិយៈ ផ្តល់ភាពកក់ក្តៅ៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
