បាល់ទាត់៖ ក្លិបសូលទីឡូអង្គរប្រកាសតែងតាំងលោក អ៊ុក សុធី គ្រូជំនួយក្រុមជម្រើសជាតិកម្ពុជា ដែលជាអតីតកីឡាកររហស្សនាម Messi ក្លិបភ្នំពេញក្រោនគឺជាគ្រូបង្វឹកថ្មីរបស់ខ្លួន បន្ទាប់ពីក្លិបបានចែកផ្លូវជាមួយលោក Darren Pomroy (Charlie) កាលពីចុងសប្ដាហ៍កន្លងទៅ ។
ការតែងតាំងគ្រូថ្មីនេះធ្វើឡើងភ្លាមៗ បន្ទាប់ពីសូលទីឡូអង្គរបានចែកផ្លូវជាមួយគ្រូបង្វឹកសញ្ជាតិអង់គ្លេសលោក Charlie កាលពីថ្ងៃទី១-កក្កដា ស្របពេលលោក អ៊ុក សុធី ទើបបញ្ចប់បេសកកម្មជាមួយក្រុមជម្រើសជាតិកម្ពុជា ក្រោមការដឹកនាំរបស់អ្នកចាត់ការទូទៅលោក Keisuke honda ដែលជាប្រធានក្លិបសូលទីឡូអង្គរផ្ទាល់កាលពីពេលថ្មីៗ ក្នុងការប្រកួតជម្រុះពានរង្វាន់បាល់ទាត់ពិភពលោកឆ្នាំ២០២២ នៅប្រទេសបារ៉ែន។ អ៊ុក សុធី គឺអតីតកីឡាករមានបទពិសោធន៍ជោគជាំលើទីលាន ក្រោយចំណាយពេលជិត ១ទសវត្សរ៍លើសមរភូមិវាលស្មៅជាមួយក្លិបសិង្ហក្រហមភ្នំពេញក្រោន មុនលោកចូលនិវត្តន៍នៅចុងឆ្នាំ២០២១៩។ ក្រោយព្យួរស្បែកជើងពីអាជីពកីឡាករ គ្រូបង្វឹកកាន់សញ្ញាបត្រ B-License រូបនេះត្រូវបានតែងតាំងអ្នកជាអ្នកសម្របសម្រួលបច្ចេកទេស ក្រុមយុវជនថ្នាលក្លិបភ្នំពេញក្រោន រហូតត្រូវបានសហព័ន្ធជ្រើសរើសជាគ្រូជំនួយក្រុមជម្រើសជាតិកម្ពុជាកាលពីថ្មីៗ។
ទន្ទឹមជាមួយការទទួលបានតួនាទីគ្រូបង្គោលក្លិប លីគកំពូលកម្ពុជាលើកដំបូងរបស់គ្រូបង្វឹកវ័យ ៣៤ឆ្នាំរូបនេះក៏ទទួលបានការអបអរសាទរ ពីគ្រូបង្វឹកក្លិបសូលទីឡូចាស់លោក Charlie ផងដែរ ដោយលោកបានជូនពរលោក អ៊ុក សុធី ឲ្យជួបសំណាងល្អក្នុងតួនាទីថ្មីនៅក្លិបសូលទីឡូអង្គរ ដែលសម្បូរកីឡាករមានទេពកោសល្យ និងខិតខំប្រឹងប្រែង។ ពិសេសគ្រូបង្វឹកសញ្ជាតិអង់គ្លេសរូបនេះ បានអបអរអតីតកីឡាករជម្រើសជាតិដដែល ដែលបានក្លាយជាគ្រូបង្វឹកវ័យក្មេងរបស់កម្ពុជា ត្រូវបានផ្ដល់ឱកាសឲ្យដឹកនាំក្រុមនៃលីគកំពូលកម្ពុជាទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
