នៅឆ្នាំ២០២៣កន្លងទៅនេះ កម្លាំងសមត្ថកិច្ចសហការខិតខំបង្ក្រាបបាននូវបទល្មើសចំនួនជាង ៧ពាន់ករណី ក្នុងនោះរឹបអូសនូវសាធាតុញៀនខុសច្បាប់ចំនួនជាង ៣តោន ខណៈឆ្នាំ២០២២ មានរហូតដល់ ១៦តោន និងឃាត់ខ្លួនជាង១៧ ០០០នាក់ហើយត្រូវបានបញ្ជូនទៅតុលាការជាង ៨ ៧០០នាក់។

ក្នុងសន្និបាតបូកសរុបពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់​ក្រសួងមហាផ្ទៃ នៅថ្ងៃទី២៨ ខែកុម្ភៈ ឆ្នាំ២០២៤ ឧត្តមសេនីយ៍ឯក ផាត សុផានិត អគ្គ​លេខា​ធិការ នៃអគ្គលេខាធិការដ្ឋានក្រសួងមហាផ្ទៃលើកឡើងថា ជាការកត់​សម្គាល់​ចំពោះ​ករណី​គ្រឿង​ញៀន​ធំៗ ដែលមានចាប់ពី ១គីឡូក្រាមឡើងទៅ និងធ្វើការបង្ក្រាបទីតាំងកែច្នៃ កាលពី​ឆ្នាំ​២០២២ មាន៤៦ករណី ហើយឆ្នាំ២០២៣ មាន៤៣ករណី ។

លោកឧត្តមសេនីយ៍ឯក បានបន្តថា នៅឆ្នាំដដែលនេះ បទល្មើស​ព្រហ្ម​ទណ្ឌ​បាន​កើត​ឡើង​ចំនួន​ជាង​៣ ៥០០លើក កើនឡើងប្រមាណ២៧ភាគរយ បង្ក្រាបបានចំនួនជាង ៣ ០០០ករណី ស្មើនឹង​៩០ភាគរយ ដោយឃាត់ខ្លួនជនសង្ស័យបានចំនួនជាង ៥ពាន់នាក់ ដែលប្រមាណ​៣៣​ភាគ​រយ ពាក់ព័ន្ធនឹងបទល្មើសគ្រឿងញៀន។

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមាន​ប្រសាសន៍​ថា ក្រៅពីការងារសន្តិសុខសណ្ដាប់ធ្នាប់ និងភូមិឃុំសង្កាត់មានសុវត្ថិភាព សមត្ថកិច្ច​ក៏​ពង្រឹង​ផ​ង​ដែរ​ នូវបញ្ហាអន្តោប្រវេសន៍ ដោយបានត្រួតពិនិត្យយ៉ាងយកចិត្តទុកដាក់ ចំពោះការ​ចេញ​ចូល​តាម​ច្រកទ្វារ​ព្រំដែននានា ក៏ដូចជាពង្រឹងការចុះពិនិត្យការស្នាក់នៅ ឬធ្វើការងាររបស់​ជន​បរទេស​នៅ​កម្ពុជា ហើយក៏បានតាមដានសភាពការណ៍ជាប្រចាំ ដែលកំពុងកើតឡើងនៅលើពិភពលោក ជា​ពិសេស​ការការពារបញ្ហាភេរវកម្ម ខណៈកាលពីឆ្នាំ២០២៣កន្លងទៅ ពុំមានករណីនេះ បានកើត​ឡើង​នៅ​ក្នុងប្រទេសកម្ពុជានោះដែរ ។

ជាមួយនេះ ឯកឧត្តម ស សុខា ក៏បានជំរុញបន្ថែមដល់សមត្ថកិច្ចពាក់ព័ន្ធទាំងអស់ ត្រូវខិតខំ​អនុវត្តន៍​បទ​បញ្ជានានា ដែលបានដាក់ចេញដោយសម្ដេចធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជា​ណា​ចក្រកម្ពុជា ដែលក្នុងនោះមានបញ្ហាគ្រឿងញៀន ក្មេងទំនើប ល្បែងស៊ីសង់ ពង្រឹង​គោល​នយោបាយភូមឃុំមានសុវត្ថិភាពជាដើម ក៏ដូចជា​ការ​ពង្រឹង​ការ​អនុវត្តន៍​ច្បាប់​ចរាចរណ៍​ផ្លូវគោក និងខិតខំលើកមុខមាត់រាជរដ្ឋាភិបាល នីតិកាលទី៧ ។

គួរបញ្ជាក់ថាកាលកន្លងទៅថ្មីៗនេះ សម្ដេចធិបតី ហ៊ុន ម៉ាណែត បាន​ដាក់​ចេញ​នូវ​វិធានការ​យ៉ាង​ម៉ឺង​ម៉ាត់ ដើម្បីបោសសំអាតបញ្ហាគ្រឿងញៀន គឺជាបឋម បើរកឃើញក្នុងជួរមន្ត្រីរាជការណា ដែល​ប្រើ​ប្រាស់គ្រឿងញៀន នឹងបណ្តេញចេញពីក្របខណ្ឌ ពោលគឺមិន​ចំពោះ​តែ​កង​កម្លាំង​ប្រដាប់​អាវុធ​នោះទេ ហើយជំរុញឲ្យការអនុវត្តបង្ក្រាបបទល្មើសគ្រឿងញៀន ឲ្យបានម៉ឺងម៉ាត់បំផុត មិន​ត្រូវ​ធ្វើដូចទៅនឹងការវែកចកនោះដែរ ។

ដោយឡែកក្នុងក្របខណ្ឌក្រសួងមហាផ្ទៃ ចាប់ពីអំឡុងខែតុលា ឆ្នាំ២០២៣ រហូតដល់ថ្ងៃទី២៩ ខែមករា ឆ្នាំ ២០២៤ មានកម្លាំងនគរបាលជាតិប្រមាណជិត ១០០នាក់ហើយ ត្រូវបាន​បណ្តេញ​ចេញ​ពី​ក្របខ័ណ្ឌ ដើម្បីធ្វើការបោសម្អាតមន្ត្រីមិនល្អចេញ ដោយមន្ត្រីត្រូវ​បាន​បណ្តេញ​ចេញ​ពី​ក្រប​ខ័ណ្ឌ​ទាំងនោះ មានមន្ត្រីនគរបាលជាតិប្រមាណជិត ៥០នាក់ ដែលធ្វើតេស្ត​ឃើញ​មាន​សារ​ធាតុ​ញៀន ត្រូវបានចាត់នីតិវិធីបណ្តេញចេញពីក្របខ័ណ្ឌ៕ អត្ថបទ៖ បាន សុខរិទ្ធិ