ភ្នំពេញ៖ ឯកឧត្ដម នេត្រ ភក្រ្ដា រដ្ឋមន្ដ្រីក្រសួងព័ត៌មានបានបញ្ជាក់នៅថ្ងៃទី២៨ ខែកុម្ភៈ ឆ្នាំ ២០២៤នេះថា ព័ត៌មានដែលផ្សព្វផ្សាយនៅលើបណ្តាញសង្គមថា «ករណីអេស្កាវាទ័រកិន​ពលរដ្ឋ​នៅ​ខេត្ត​កោះកុងស្លាប់ភ្លាមៗ គ្រាន់តែគ្នាទៅការពារដីរបស់ខ្លួន»ជាព័ត៌មានក្លែងក្លាយ។

ឯកឧត្តម នេត្រ ភក្រ្ដា រដ្ឋមន្រ្ដីក្រសួងព័ត៌មាន បានបញ្ជាក់ថា យោងតាមអាជ្ញាធរស្រុកបទុមសាទរ ខេត្តកោះកុង ពលរដ្ឋដែលបានស្លាប់នោះឈ្មោះ សាត សាខន ជាអ្នក​ជួល​អេស្កាវាទ័រ​មក​ឈូស​ឆាយ​ចម្ការ​ខ្លួន ដោយអ្នកបើកថយមិនបានមើលក៏បានកិនស្លាប់ មិនមែនមកពីការតវ៉ាដីធ្លីឡើយ។ ដូច្នេះសូមសាធារមតិកុំមានការយល់ច្រឡំ និងបញ្ឈប់ការចែកចាយព័ត៌មានក្លែងក្លាយនេះ។

យោង​តាមសេចក្ដីបំភ្លឺរបស់អធិការដ្ឋាននគរបាល ស្រុកបូទុមសាគរ បានឱ្យដឹងថា នៅថ្ងៃទី២១ ខែ​កុម្ភៈ ឆ្នាំ២០២៤ វេលាម៉ោង១៣ និង៥០នាទី នៅចំណុចភ្នំត្រងោល ស្ថិតនៅភូមិជីមាល ឃុំ​អណ្ដូង​ទឹក ស្រុកបូទុមសាគរ ខេត្តកោះកុង មានករណីអិចស្កាវ៉ាទ័រ ថយកិនបុរស១នាក់ស្លាប់ ក្រោយ​ពេល​កើតហេតុអ្នកបើកបរគ្រឿងចក្របានរត់គេចខ្លួន។ សពជនរងគ្រោះ ឈ្មោះ សាត សាខន ភេទប្រុស អាយុ៦៣ឆ្នាំ (ស្លាប់នៅកន្លែងកើតហេតុ) មានទីលំនៅភូមិអណ្ដូងទឹក ស្រុក​បូទុមសាគរ ខេត្តកោះកុង។ ក្រោយពេលកើតហេតុកម្លាំងជំនាញ និងគ្រូពេទ្យមណ្ឌលសុខភាព បាន​ទៅ​ពិនិត្យ​សាកសពជនរងគ្រោះ ពិតជាស្លាប់ដោយសារគ្រឿងចក្រកិនស្លាប់ពិតប្រាកដមែន។

អធិការដ្ឋាននគរបាល ស្រុកបូទុមសាគរ បានឱ្យដឹងថា ករណីនេះ​បណ្ដាល​មក​ពី​មូល​ហេតុ​អ្នក​បើកបរ​គ្រឿង​ចក្រខ្វះការប្រុងប្រយ័ត្ន។ ហើយបើតាមការបំភ្លឺពីរសាច់ញ្ញាតិរបស់ជនរងគ្រោះថា ជន​រងគ្រោះបានជួលគ្រឿងចក្រ មកវ៉ៃព្រៃ និងជីកស្រះទឹក នៅចំការរបស់ជនរងគ្រោះ។

អធិការដ្ឋាននគរបាល ស្រុកបូទុមសាគរ បញ្ជាក់ថា ករណីខាង​លើកនេះ​កម្លាំង​ផ្នែក​ជំនាញ​ព្រហ្ម​ទណ្ទ​ស្រុក កំពង់ស្រាវជ្រាវសាវតាជាតិអ្នកបើកបរបង្ករ និងតាមចាប់ខ្លួន និងកសាង​សំនុំ​រឿង​តាម​និតិ​វិធីច្បាប់។ ចំពោះវត្ថុតាងគ្រឿងចក្រ(អិចស្កាវ៉ាទ័រ)យកមករក្សាទុកនៅអធិការដ្ឋាន៕