រដ្ឋាភិបាលរបស់ប្រទេសចិន នៅថ្ងៃពុធ (ទី២៨ ខែកុម្ភៈ) នេះ បានលើកឡើងថា ការល្បាតរបស់ឆ្មាំល្បាតឆ្នេររបស់ខ្លួន ជុំវិញប្រជុំកោះតៃវ៉ាន់ នៅជិតឆ្នេរសមុទ្រចិន គឺ «គ្មានអ្វីត្រូវរិះគន់នោះទេ» ហើយបានច្រានចោលការត្អូញត្អែរដែលថា ការឡើងទូកទេសចរណ៍របស់កោះតៃវ៉ាន់ពីសំណាក់ឆ្មាំល្បាត បានបង្កឲ្យមានការភ័យស្លន់ស្លោ។

ឆ្មាំល្បាតឆ្នេររបស់ប្រទេសចិន ក្នុងខែកុម្ភៈនេះ បានចាប់ផ្តើមការល្បាតជាប្រចាំ នៅជុំវិញប្រជុំកោះដែលគ្រប់គ្រងដោយកោះតៃវ៉ាន់ គឺប្រជុំកោះ Kinmen ដែលមានទីតាំងនៅទល់មុខនឹងទីក្រុង Xiamen និង Quanzhou របស់ប្រទេសចិន ជាកន្លែងដែលពលរដ្ឋចិន ២នាក់ បានស្លាប់ ពេលព្យាយាមរត់គេចពីឆ្មាំល្បាតឆ្នេររបស់កោះតៃវ៉ាន់ បន្ទាប់ពីទូករបស់ពួកគេបានចូលទៅក្នុងដែនទឹកហាមឃាត់។

កោះតៃវ៉ាន់ កាលពីសប្តាហ៍មុន បានប្រាប់ឲ្យដឹងថា ទូកទេសចរណ៍កោះតៃវ៉ាន់ ដែលធ្វើដំណើរចេញពីប្រជុំកោះ Kinmen ត្រូវបានឆ្មាំល្បាតឆ្នេររបស់ចិនឡើងជិះមួយភ្លែត ដែលការធ្វើបែបនោះបានបង្កឲ្យមាន «ការភ័យស្លន់ស្លោ» ហើយបន្ថែមថា នៅក្នុងសប្តាហ៍នេះ នាវាចិនចំនួន ៥គ្រឿង បានចូលទៅក្នុងដែនទឹកហាមឃាត់ ឬស្ថិតក្រោមការគ្រប់គ្រង។

នៅឯសន្និសីទសារព័ត៌មានដែលតែងធ្វើជាប្រចាំនៅទីក្រុងប៉េកាំង អ្នកនាំពាក្យការិយាល័យសម្រាប់កិច្ចការកោះតៃវ៉ាន់របស់ប្រទេសចិន លោកស្រី Zhu Fenglian បានរំលឹកឡើងវិញថា ខ្លួនមិនទទួលស្គាល់ដែនទឹកដែលគ្មានដែនកំណត់ ជុំវិញប្រជុំកោះ Kinmen សម្រាប់អ្នកនេសាទនោះទេ ហើយបាននិយាយថា ឆ្មាំល្បាតឆ្នេរមិនបានបង្កឲ្យមានជាការភ័យខ្លាច ឬរឿងរ៉ាវមិនល្អណាមួយពីការឡើងទូកទេសចរណ៍នោះទេ។

អ្នកស្រីបានបន្ថែមថា ឆ្មាំល្បាតឆ្នេរអនុវត្តភារកិច្ចផ្លូវការរបស់ខ្លយននៅក្នុង «ដែនទឹករបស់ពួកគេ» ដោយស្របតាមច្បាប់ ដើម្បីរក្សា «សណ្តាប់ធ្នាប់ធម្មតា» និងការពារអាយុជីវិតអ្នកនេសាទ និងអ្នកធ្វើដំណើរ៕