គេរំពឹងថា កិច្ចប្រជុំបណ្ដាមេដឹកនាំហិរញ្ញវត្ថុនៃក្រុមប្រទេសទាំង២០ (G20) នៅប្រទេសប្រេស៊ីល ក្នុងសប្តាហ៍នេះ នឹងត្រឹមតែធ្វើសេចក្តីយោងខ្លីៗប៉ុណ្ណោះ នៅក្នុងសេចក្តីថ្លែងការណ៍បិទរបស់ពួកគេ ពាក់ព័ន្ធនឹងជម្លោះក្នុងតំបន់។ នេះបើយោងតាមទម្រង់សេចក្តីព្រាងដែលសារព័ត៌មាន Reuters បានឃើញ ដោយការសម្រេចបែបនេះ គឺដោយសារមានការខ្វែងគំនិតយ៉ាងខ្លាំង ជុំវិញសង្រ្គាម នៅតំបន់ហ្កាហ្សា និងនៅប្រទេសអ៊ុយក្រែន។

ខណៈដែលប្រទេសម្ចាស់ផ្ទះប្រេស៊ីលប្រែងប្រែងធ្វើយ៉ាងណា ដើម្បីគេចចេញពីជម្លោះភូមិសាស្ត្រនយោបាយ សេចក្តីប្រកាសព្រាងដែលខ្លីជាងបណ្ដាឆ្នាំមុនៗ ក៏បានបង្ហាញផងដែរថា លទ្ធភាពអំណោយផលដល់សេដ្ឋកិច្ចពិភពលោក បានកើនឡើង ប៉ុន្តែភាពមិនច្បាស់លាស់នៅតែមានកម្រិតខ្ពស់ដដែល។

លោកស្រីវេជ្ជបណ្ឌិត Kristalina Georgieva ប្រធានមូលនិធិរូបិយវត្ថុអន្តរជាតិ (IMF) បាននិយាយថា ផលប៉ះពាល់ជារួមពីសង្គ្រាម តែងតែមានភាពអវិជ្ជមានជានិច្ច ហើយសង្គ្រាមអ៊ីស្រាអែល-ហ្កាហ្សា កំពុងបន្ថែមភាពមិនប្រាកដប្រជា សម្រាប់សេដ្ឋកិច្ចពិភពលោក ក្នុងពេលមានកំណើនយឺតៗ។

ការជួបជុំរបស់រដ្ឋមន្ត្រីការបរទេស កាលពីសប្តាហ៍មុន នៅទីក្រុង Rio de Janeiro បានបង្ហាញឲ្យឃើញពីការបែកបាក់យ៉ាងស៊ីជម្រៅ ជុំវិញការលុកលុយរបស់រុស្ស៊ីលើអ៊ុយក្រែន និងការទម្លាក់គ្រាប់បែករបស់អ៊ីស្រាអែលលើតំបន់ហ្កាហ្សា។ បន្ទាប់ពីកិច្ចប្រជុំនោះ គេរំពឹងថា មន្ត្រីហិរញ្ញវត្ថុ G20 នឹងទុកបញ្ហាភូមិសាស្ត្រនយោបាយដោយឡែក ហើយផ្តោតលើបញ្ហាសេដ្ឋកិច្ចពិភពលោក នៅពេលដែលពួកគេជួបជុំគ្នានៅទីក្រុង Sao Paulo ក្នុងសប្តាហ៍នេះ។

ចំណែករដ្ឋមន្ត្រីក្រសួងរតនាគារអាមេរិក លោកស្រី Janet Yellen កាលពីថ្ងៃអង្គារ (ទី២៧ ខែកុម្ភៈ) បានអំពាវនាវដល់សម្ព័ន្ធមិត្តឲ្យធ្វើដំណើរឆ្ពោះទៅមុខជាបន្ទាន់ ក្នុងគោលបំណងធ្វើយ៉ាងណាបញ្ចេញទ្រព្យសម្បត្តិអធិបតេយ្យរុស្ស៊ីដែលត្រូវបានបង្កក ដើម្បីយកទៅជួយអ៊ុយក្រែន ដែលការលើកឡើងនេះជំរុញមានការឆ្លើយតបដោយកំហឹងពីមន្ត្រីរុស្ស៊ី៕