រដ្ឋមន្ត្រីការពារជាតិកូរ៉េខាងត្បូង បាននិយាយថា រោងចក្រអាវុធរបស់កូរ៉េខាងជើង «កំពុងដំណើរការយ៉ាងពេញសមត្ថភាព» ដើម្បីផលិតសព្វាវុធ និងគ្រាប់ផ្លោងសម្រាប់រុស្ស៊ី ខណៈដែលសង្រ្គាមដ៏បំផ្លិចបំផ្លាញរបស់ទីក្រុងមូស្គូនៅអ៊ុយក្រែន បានឈានចូលដល់ឆ្នាំទីបីហើយនោះ។

ការប៉ាន់ប្រមាណចុងក្រោយបង្អស់ពីកូរ៉េខាងត្បូងផ្តល់នូវតម្រុយថ្មីៗអំពីតួនាទីដ៏សំខាន់ ប៉ុន្តែតួនាទី សម្ងាត់បំផុត ដែលកូរ៉េខាងជើង កំពុងបំពេញដើម្បីជួយផ្គត់ផ្គង់សង្គ្រាមរបស់ទីក្រុងមូស្គូឡើងវិញ នៅពេលដែលតម្រូវការផ្ទាល់របស់អ៊ុយក្រែនសម្រាប់ការផ្គត់ផ្គង់ផ្នែកយោធាសំខាន់ៗ កំពុងត្រូវបានពន្យារពេលដោយសមាជិកសភាសាធារណៈរដ្ឋភាគច្រើន នៅក្នុងទីក្រុងវ៉ាស៊ីនតោន។

រដ្ឋមន្ត្រីការពារជាតិកូរ៉េខាងត្បូង លោក Shin Won-sik បាននិយាយកាលពីថ្ងៃចន្ទថា សព្វាវុធ និងគ្រឿងយុទ្ធោបករណ៍ដែលរាប់បញ្ចូលទាំងគ្រាប់កាំភ្លើងធំរាប់លានគ្រាប់ កំពុងតែត្រូវបានបញ្ជូនទៅកាន់ប្រទេស   រុស្ស៊ី ជាថ្នូរនឹងការដឹកជញ្ជូនស្បៀងអាហារ និងសម្ភារៈចាំបាច់ផ្សេងៗទៀត។

លោកShin បានបញ្ជាក់ថា ចាប់តាំងពីខែសីហាមក ទីក្រុងព្យុងយ៉ាង បានដឹកជញ្ជូនកុងតឺន័រប្រហែល ៦.៧០០ទៅកាន់ប្រទេសរុស្ស៊ី ដែលអាចផ្ទុកបានគ្រាប់កាំភ្លើងធំ ១៥២មីលិម៉ែត្រជាង៣លានគ្រាប់ ឬ គ្រាប់រ៉ុក្កែតធុន១២២មីលិម៉ែត្រជាង៥០០.០០គ្រាប់។

លោក Shin បាននិយាយនៅក្នុងកិច្ចប្រជុំជាមួយអ្នកយកព័ត៌មានថា ខណៈពេលដែលរោងចក្រសព្វាវុធរបស់កូរ៉េខាងជើង (សម្រាប់ការនាំចេញមិនមែនរុស្ស៊ី)ដំណើរការ ក្នុងសមត្ថភាព៣០ភាគ ដោយសារតែ   កង្វះវត្ថុធាតុដើម និងអគ្គិសនី រោងចក្រផលិតអាវុធ និងកាំភ្លើងធំសម្រាប់ប្រទេសរុស្ស៊ី កំពុងដំណើរការ  យ៉ាងពេញសមត្ថភាព។