ពលរដ្ឋយេម៉ែន ដែលភាគច្រើនគឺជាអ្នកគាំទ្រក្រុមឧទ្ទាមហ៊ូទី បានដង្ហែក្បួនតាមផ្លូវនៅក្នុងរដ្ឋធានី Sanaa ប្រទេសយេម៉ែននាថ្ងៃពុធនេះ ជាការបង្ហាញសាមគ្គីភាពជាមួយជនប៉ាឡេស្ទីននៅតំបន់ហ្កាហ្សាស្រ្ទីប ។

 លោក Mohamed Ahmed Hajar គឺជាអ្នកគាំទ្រក្រុមឧទ្ទាមហ៊ូទី និយាយថា ពួកយើងចេញដង្ហែក្បួនតាមផ្លូវនៅថ្ងៃនេះ ដើម្បីបង្ហាញអាវុធរបស់ពួកយើង ដែលបង្ហាញពីការត្រៀមខ្លួនរបស់ពលរដ្ឋយេម៉ែន ជាពិសេសនៅក្នុងទីក្រុងចាស់ Sanaa ដើម្បីចូលរួមធ្វើសង្រ្គាមឲ្យបានសម្រេច ដូចការប្រកាសឲ្យដឹងរបស់លោកមេដឹកនាំ Abdulmalik Al-Houthi ។

 ក្រុមឧទ្ទាមហ៊ូទី ដែលគ្រប់គ្រងរដ្ឋធានីយេម៉ែន និងតំបន់មានពលរដ្ឋរស់នៅច្រើនបំផុតនោះ មានគោលដៅវាយប្រហារលើការដឹកជញ្ជូនអន្តរជាតិនៅក្នុងសមុទ្រក្រហម ជាហេតុធ្វើឲ្យមានការវាយប្រហារសងសឹកវិញពីសហរដ្ឋអាមេរិក និងអង់គ្លេស ចាប់តាំងពីខែមុនរហូតមក ។

 ការវាយប្រហាររបស់ក្រុមជីវពលមួយនេះ បានធ្វើឲ្យអាក់ខានដល់ផ្លូវទឹកដែលស្មើនឹង ១២ភាគរយនៃការធ្វើចរាចរណ៍សមុទ្រសកល ហើយនិងបង្ខំឲ្យក្រុមហ៊ុនជាច្រើន ផ្លាស់ប្តូរទិសដៅធ្វើដំណើររបស់នាវាពួកគេទៅកាន់ផ្លូវទឹកដែលប្រើរយៈពេលយូរ ជុំវិញទ្វីបអាហ្វ្រិក ។

 សហរដ្ឋអាមេរិក បានប្រកាសកាលពីខែមុនថា ក្រុមឧទ្ទាមហ៊ូទី នឹងវិលត្រឡប់មកក្នុងបញ្ជីឈ្មោះក្រុមភេរវកម្ម ដែលត្រូវរងទណ្ឌកម្មធ្ងន់ធ្ងរដូចក្រុមដែលមានសម្ព័ន្ធមិត្តជាមួយអ៊ីរ៉ង់ ក្នុងគោលដៅកាត់បន្ថយការផ្តល់មូលនិធិ និងអាវុធដល់ក្រុមហ៊ូទី សម្រាប់ការប្រើប្រាស់របស់ពួកគេ ក្នុងការវាយប្រហារនៅសមុទ្រក្រហម ៕