សមាគមអឌ្ឍចន្ទក្រហមប៉ាឡេស្ទីនឬ (PRCS) នៅថ្ងៃពុធនេះ បានផ្សព្វផ្សាយវីដេអូបង្ហាញពីគ្រូពេទ្យបឋមសង្គ្រោះ បន្ទាប់ពីការវាយប្រហាររបស់អ៊ីស្រាអែលលើលំនីឋានមួយខ្នងដែលគេនិយាយថា ជាកម្មសិទ្ធរបស់គ្រួសារបាគើរ(Bakr)។

ដោយបង្ហោះលើបណ្តាញសង្គមX វីដេអូនេះបានបង្ហាញក្រុមពេទ្យបឋមសង្គ្រោះ និងមនុស្សជាច្រើននាក់ កំពុងដើរពីលើកម្ទេចថ្មនៃលំនៅឋានដែលត្រូវបានបំផ្លាញ នៅក្នុងក្រុង ដេអាល់បាឡាស់ (Dei al-Balah) និងកំពុងប្រើប្រាស់ពន្លឺភ្លើងពិលដើម្បីស្វែងរកអ្នកដែលនៅរស់។

អ្នកសារព័ត៌មានReuters មិនអាចផ្ទៀងផ្ទាត់ដោយឯករាជ្យបានទេពីទីតាំង ឬទិន្នន័យនៅពេលដែលវីដេអូនេះត្រូវបានគេថត។

ប្រធានាធិបតីអាមេរិកលោក ចូបៃឌិន បាននិយាយ កាលពីថ្ងៃច័ន្ទថា លោកមានជំនឿថា បទឈប់បាញ់មួយ អាចនឹងសម្រេចបាន ក្នុងក្របខណ្ឌ១សប្ដាហ៍ ដើម្បីផ្អាកសង្រ្គាមសម្រាប់ពិធីបុណ្យរ៉ាម៉ាដាន។

នៅឯអង្គការសហប្រជាជាតិ ក្នុងទីក្រុងញូយ៉ក ក្រុមមន្រ្ដីផ្ដល់ជំនួយ បានប្រាប់ក្រុមប្រឹក្សាសន្ដិសុខ កាលពីថ្ងៃអង្គារថា ១ភាគ៤នៃប្រជាជនតំបន់ហ្កាហ្សាគឺនៅសល់តែមួយជំហានទៀត នឹងចូលដល់គ្រោះទុរ្ភិក្សហើយ៕