កូរ៉េខាងត្បូង៖ លោកនាយករដ្ឋមន្ត្រី Kim Boo-kyum បាននិយាយនៅថ្ងៃសុក្រនេះថា ប្រទេសកូរ៉េខាងត្បូងនឹងបង្កើនការរឹតបន្តឹងទប់ស្កាត់ ការឆ្លងរាលដាលវីរុសកូរ៉ូណាដល់កម្រិតខ្ពស់បំផុតនៅក្នុងរដ្ឋធានីសេអ៊ូល និងតំបន់ជិតខាងមួយចំនួនចាប់ពីថ្ងៃចន្ទ ទី១២ ខែកក្កដាតទៅ។
សេចក្ដីប្រកាសនេះធ្វើឡើង បន្ទាប់ពីកូរ៉េខាងត្បូងរាយការណ៍ការហក់ឡើងខ្ពស់បំផុត នៃករណីឆ្លងថ្មីវីរុស COVID-19 ប្រចាំថ្ងៃ ហើយមន្ត្រីជាន់ខ្ពស់សុខាភិបាលបានព្រមានថា ចំនួនករណីឆ្លងអាចនឹងកើនឡើងខ្ពស់ជិត ២ដងនៅដំណាច់ខែកក្កដានេះ។ ក្រោមវិធានការទប់ស្កាត់ថ្មី ប្រជាពលរដ្ឋត្រូវបានណែនាំឲ្យស្នាក់នៅក្នុងផ្ទះឲ្យបានច្រើនតាមលទ្ធភាព សាលារៀនទាំងអស់ត្រូវបិទ ការជួបជុំសាធារណៈត្រូវបានរឹតត្បិតត្រឹមមនុស្ស ២នាក់បន្ទាប់ពីម៉ោង ៦ព្រឹក និងការប្រមូលផ្ដុំ ឬព្រឹត្តិការណ៍នានាត្រូវបានហាមឃាត់។
ក្លឹបរាត្រី និងបារកម្សាន្តនានានឹងត្រូវបិទ ខណៈដែលភោជនីយដ្ឋាន និងហាងកាហ្វេនឹងត្រូវកំណត់ចំនួនកន្លែងអង្គុយ ហើយបើកឲ្យត្រឹមតែវិចខ្ចប់ប៉ុណ្ណោះបន្ទាប់ពីម៉ោង ១០យប់តទៅ។ គិតត្រឹមព្រឹកថ្ងៃសុក្រនេះ ប្រទេសកូរ៉េខាងត្បូងមានករណីឆ្លងសុបចំនួន ១៦៤,០២៨នាក់ និងស្លាប់ចំនួន ២,០៣៤នាក់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
