ប្រទេសអាល្លឺម៉ង់កំពុងធ្វើជាម្ចាស់ផ្ទះនៃកិច្ចចរចាសន្តិភាពរយៈពេល ២ថ្ងៃ រវាងប្រទេសអាស៊ែបៃហ្សង់ និងអាមេនី ដោយការចរចានេះ បានកើតឡើងក្នុងរយៈពេល ៥ខែបន្ទាប់ពីអាស៊ែបៃហ្សង់ បានដណ្តើមកាន់កាប់វិញនូវតំបន់ Karabakh ពីជនជាតិភាគតិចអាមេនី ដែលការវាយកាន់កាប់នោះបានជំរុញឲ្យជនជាតិអាមេនីភៀសខ្លួនក្នុងចំនួនដ៏ច្រើន។

អាស៊ែបៃហ្សង់បង្កអរិភាពកាន់តែខ្លាំងឡើង ចំពោះការពាក់ព័ន្ធពីខាងក្រៅ ដែលចង់ជួយសម្រុះសម្រួលឲ្យមានព្រមព្រៀងមួយ ដោយប្រធានាធិបតី លោក Ilham Aliyev បានចោទប្រកាន់សហរដ្ឋអាមេរិកថា បានធ្វើឲ្យប៉ះពាល់ដល់ទំនាក់ទំនង ដោយការឈរនៅខាងអាមេនី។

ប៉ុន្តែរដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បានធ្វើដំណើរទៅកាន់ប្រទេសទាំង២ កាលពីខែវិច្ឆិកា។ ហើយអធិការបតីអាល្លឺម៉ង់ លោក Olaf Scholz បានជួបលោក Aliyev និងនាយករដ្ឋមន្ត្រីអាមេនី លោក Nikol Pashinyan នៅក្រៅសន្និសីទសន្តិសុខទីក្រុង Munich ក្នុងខែនេះ។

កាលពីខែធ្នូ ប្រទេសជិតខាង នៅតំបន់ Caucasus ខាងត្បូង បានចេញសេចក្តីថ្លែងការណ៍រួមមួយ ដោយនិយាយថា ប្រទេសទាំង២ ចង់ឈានដល់កិច្ចព្រមព្រៀងសន្តិភាព៕