ក្នុងជំនួបពិភាក្សាទ្វេភាគីជាមួយសមាជិកសភាអាល្លឺម៉ង់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភានៃព្រះរាជាណាចក្រកម្ពុជា បានស្នើរដ្ឋសភាអាល្លឺម៉ង់បន្ត​ពង្រឹងកិច្ច​សហការ​​ថែមទៀត ក្នុងក្របខណ្ឌនីតិប្បញ្ញត្តិ។

នៅថ្ងៃទី២៩ ខែកុម្ភៈ ឆ្នាំ២០២៤ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា តំណាង​សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា បាន​អញ្ជើញ​ជួប​ពិភាក្សា​ការងារ​ជាមួយ​លោកជំទាវ ម៉ាទីណា ស្ទែម ហ្វីប៊ិច ប្រធានគណៈកម្មាធិការ​សម្រប​សម្រួល​ញត្តិ​នៃ​រដ្ឋសភា​សហព័ន្ធអាល្លឺម៉ង់។ ជាកិច្ចស្វាគមន៍ ឯកឧត្តម ជាម យៀប មានប្រសាសន៍ថា ជំនួបនាថ្ងៃនេះ គឺជាសក្ខីភាពបង្ហាញ​ឲ្យ​ឃើញ​កាន់​តែច្បាស់​ថែម​ទៀត​អំពី​សារៈ​សំខាន់​នៃ​ទំនាក់ទំនង និងកិច្ចសហប្រតិបត្តិការរបស់ស្ថាប័ននីតិប្បញ្ញត្តិនៃប្រទេសទាំងពីរ ដែល​អាល្លឺម៉ង់​ជា​ប្រទេស​ដែល​បាន​ជួយ​គាំទ្រ​លើ​ការ​អភិវឌ្ឍ​មក​ជាយូរ​អង្វែង​នៅ​កម្ពុ​ជា​មិន​ថា​ទាំង​ស្ថាប័ន​នីតិប្បញ្ញត្តិ និងរាជរដ្ឋាភិបាល។

ក្នុងនាមរដ្ឋសភា ឯកឧត្តម បានថ្លែងអំណរគុណជូនដល់រដ្ឋសភា រដ្ឋាភិបាល និង​ប្រជាជន​អាល្លឺម៉ង់​ ដែលផ្តល់ជំនួយជាបន្តបន្ទាប់សម្រាប់ការអភិវឌ្ឍសង្គម-សេដ្ឋកិច្ចនៅកម្ពុជាទាំងទ្វេភាគី និងជំនួយ​ដល់អង្គការសង្គមស៊ីវិលនៅកម្ពុជា។

ឯកឧត្តម ថ្លែងថា រដ្ឋសភាកម្ពុជាបានបង្កើតក្រុមមិត្តភាពសភាកម្ពុជា-អាល្លឺម៉ង់ នៅគ្រប់​នីតិកាល​នៃ​រដ្ឋសភាជាបន្តបន្ទាប់ ហើយកិច្ចសហប្រតិបត្តិការនេះ បាននាំមក​នូវ​ទំនាក់​ទំនង​ការ​ទូត​សភា​ទាំង​ពីរ​យ៉ាង​ល្អប្រពៃ។ ក្នុងនោះ ស្ថាប័ននីតិប្បញ្ញត្តិនៃប្រទេសទាំងពីរ បានធ្វើការយ៉ាង​សកម្ម​ក្នុង​ការ​ផ្លាស់​ប្តូរបទ ពិសោធន៍ និងចំណេះដឹងលើកិច្ចការសភាពីគ្នាទៅវិញទៅមក ខណៈរដ្ឋសភា​កម្ពុជា​បាន​សិក្សារៀនសូត្រជាច្រើនពីសភាអាល្លឺម៉ងតាមរយៈដំណើរ ទស្សនកិច្ចសិក្សា និងកម្មវិធី​ផ្សេងៗ ក៏ដូចជាការផ្លាស់ប្តូរទស្សនកិច្ចរបស់គណៈប្រតិភូ រដ្ឋសភា នៃប្រទេស​យើង​ទំាង​ពីរ​បាន​ធ្វើឡើ​ង​ជាប្រចាំ ដើម្បីស្វែងយល់ និង ទទួលបទពិសោធន៍ល្អៗពីស្ថាប័ននីតិប្បញ្ញត្តិអាល្លឺម៉ង់។

នាឱកាសនោះ ឯកឧត្តម បញ្ជាក់ថា ទាំងរដ្ឋសភា និងរាជរដ្ឋាភិបាលអាណតិ្តទី៧នេះ នឹងបន្ត​លើក​កម្ពស់ស្មារតីថែរក្សាសន្តិភាព ការពារ និងបន្តពង្រឹង និងពង្រីកលទ្ធិប្រជាធិបតេយ្យ សេរី​ពហុបក្ស ឲ្យចាក់គ្រឹះកាន់តែរឹងមាំស្ថិតស្ថេរជានិរន្តរ៍ និងស្របតាមឆន្ទៈរបស់ប្រជាជនកម្ពុជា។ លើស​ពីនេះ រដ្ឋសភា បានចូលរួមការពារ និងលើក​ស្ទួយសិទ្ធិសេរីភាព​គ្រប់​បែប​យ៉ាង​របស់​ប្រជាជន​កម្ពុជា​ដូចមានចែងក្នុងរដ្ឋធម្មនុញ្ញ។

ឯកឧត្តម បានបញ្ជាក់ជូនគណប្រតិភូរដ្ឋសភាអាល្លឺម៉ង់បន្ថែមថា រាជរដ្ឋាភិបាលអាណត្តិទី៧ នៃ​រដ្ឋសភា ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី មាន​សមត្ថភាព និង​ទេពកោសល្យដ៏ប៉ិនប្រសប់ប្រកបដោយគតិបណ្ឌិត ដើម្បីបន្តថែរក្សាសុខសន្តិភាព ឯកភាព​ជាតិ បូរណភាព ទឹកដី ស្ថិរភាពនយោបាយ អភិវឌ្ឍសង្គម-សេដ្ឋកិច្ច និងវប្បធម៌ សំដៅ​លើក​កម្ពស់​ជីវភាពរស់នៅរបស់ប្រជាពលរដ្ឋនៅឲ្យកាន់តែល្អប្រសើរឡើង។

នាឱកាសនោះដែរ ឯកឧត្តម បានបង្ហាញពីការប្តេជ្ញាចិត្តចំពោះគណៈប្រតិភូសភាអាល្លឺម៉ង់ ក្នុង​ការ​ពង្រឹង​ទំនាក់ទំនង និងកិច្ចសហប្រតិបត្តិការលើគ្រប់ វិស័យ ដែលមាន​ប្រយោជន៍​ដល់​ប្រទេស​ទាំង​ពីរ ជាពិសេសការបន្តជំរុញវិស័យដែលមានសក្តានុពលនានា រួមមាន៖ វិស័យទេសចរណ៍, វិស័យ​កសិកម្ម , វិស័យអភិវឌ្ឍជនបទ, វិស័យសុខាភិបាល និងវិស័យអប់រំ។

ក្រៅពីនេះ ក្នុងនាមសម្តេចប្រធានរដ្ឋសភា ឯកឧត្តម បានស្នើ​តាម​រយៈ​គណៈប្រតិភូ​សភា​អាល្លឺម៉ង់​អញ្ជើញ​ប្រជាជនអាល្លឺម៉ង់ឱ្យបានកាន់តែច្រើនមកកម្សាន្តនៅតំបន់ទេសចរណ៍ ក៏ដូចជា​លើក​ទឹកចិត្ត​ឱ្យ​មាន​ការវិនិយោគមកកម្ពុជា ដើម្បីកាន់តែពង្រឹងកិច្ចសហប្រតិបត្តិការ និង​សាមគ្គី​ភាព​រវាង​ប្រទេស​ទាំងពីរឱ្យមានភាពល្អប្រសើរជាងមុន៕ អត្ថបទ សេក ឧត្តម