ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ឯកឧត្តម ស សុខា បានបញ្ជា​ឲ្យ​ពង្រឹង​ការ​គ្រប់​គ្រង​អាវុធជាតិផ្ទុះឲ្យបានខ្លាំងក្លាបន្ថែមទៀត ដើម្បីសន្តិសុខជាតិ ហើយព្រមានបណ្តេញចេញ​ពី​ក្រប​ខណ្ឌ​​ចំពោះមន្រ្តីនគរ បាលណាដែលឲ្យអាវុធដល់អ្នកដទៃខ្ចី។

ក្នុងពិធីបើកសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់​ក្រសួងមហាផ្ទៃនាថ្ងៃទី២៩ ខែកុម្ភៈ ឆ្នាំ២០២៤នេះ ឯកឧត្តមឧបនាយករដ្ឋមន្រ្តី ស សុខា​ បាន​លើកឡើងថា ឯកឧត្តមរំពឹងថា «មកដល់ម៉ោងនេះកងកម្លាំងនគរបាលទាំងអស់ មិន​ប្រើប្រាស់​អាវុធ​ខុសច្បាប់ទៀតនោះទេ តែបើមានប្រើប្រាស់អាវុធខុសច្បាប់ ឬមួយមិនមាន​ការ​អនុញ្ញាត ឬឲ្យសំបុត្របេសកកម្ម និងអាវុធទៅឲ្យអ្នកដទៃខ្ចី ខ្ញុំគិតថាមិន​ចាំបាច់​ទុក​ក្នុង​ក្រប​ខណ្ឌ​អ្វី​ទៀត​នោះទេ​ គប្បីបណ្តេញចេញភ្លាមតែម្តងពីព្រោះកាំភ្លើងនេះមិនធម្មតានោះទេ កាលណា​យក​ទៅ​គឺ​យក​ទៅធ្វើអ្វីខុស អាចនឹងសម្លាប់គេបាន អាចនឹងប្រើប្រាស់​ទៅលើអ្វី​ផ្តេសផ្តាស់​បាន​ស្រេច​តែ​ចិត្ត អញ្ចឹងហើយការងារនេះសូមឲ្យមើល(គ្រប់ស្នង គារនគរបាលរាជធានី-ខេត្ត)»។

ជាមួយគ្នានោះដែរ ឯកឧត្តមឧបនាយករដ្ឋមន្រ្តី ស សុខា ក៏បានបញ្ជា​ឲ្យ​ពិនិត្យ​មើល​ចំពោះ​អ្នក​យាម​តាម​បណ្តាក្រុ​មហ៊ុនធំៗផងដែរ ខណៈសព្វថ្ងៃនេះអគ្គ​ស្នងការដ្ឋាន​នគរបាល​បាន​ប្រមូល​អ្នក​ដែល​យាម​តាមបណ្តាក្រុមហ៊ុនបានមួយចំនួនធំៗហើយ នៅសល់តែបន្តិចបន្ទួចទេ តែទោះ​ជា​យ៉ាង​ណាក៏ដោយ យើងត្រូវខិតខំប្រឹងប្រែងបន្ថែមទៀត ពីព្រោះអាវុធជាតិផ្ទុះ​នេះ​សំខាន់​ណាស់​ត្រូវ​តែ​ពិនិត្យ​ឲ្យ​បាន​ច្បាស់​លាស់​ចាប់​ពី​ពេល​នេះ​ត​ទៅ​មិន​ត្រូវ​ធ្វេស​ប្រហែស​តទៅទៀ​ត​នោះ​ឡើយ។

ដោយឡែកទាក់ទងនឹងស្លាក់លេខឡាននគរបាលវិញ ឯកឧត្តមឧបនាយករដ្ឋមន្រ្តី​ក្រសួង​មហាផ្ទៃ​ក៏​បាន​ព្រមាន​ខ្លាំងៗផងដែរ ដោយឯកឧត្តមបានធ្វើការដាស់តឿនដល់មន្រ្តីនគរបាលទាំងអស់ ដែល​ប្រើប្រាស់ស្លាកលេខឡាននគរបាលខុសរឿង ត្រូវតែបញ្ឈប់​ភ្លាម​ខណៈ​ឡាន​នគរបាល​ខ្លះ​ជិះ​ទៅ​ធ្វើ​ការ​នៅក្នុងកាស៊ីណូ និងខ្លះទៀត ចត់នៅមុខខារ៉ាអូខេជាដើមនោះ។ ដូច្នេះ​ឡាន​ស្លាក់​លេខ​នគរបាល​នេះ គឺមិនត្រូវឲ្យបុគ្គលណាខ្ចីឬក៏ប្រើក្រៅពីនគរបាលធ្វើ ការក្នុងក្រប​ខណ្ឌ​ខ្លួន​ឯង​បាន​ទេ ដូច្នេះស្នងការរាជធានី-ខេត្តទាំងអស់ត្រូវតែធ្វើការពិនិត្យឡើងវិញដើម្បី សន្តិសុខ​សណ្តាប់​ធ្នាប់​សង្គម​ជាតិ​យើង​ទាំងមូល៕ អត្ថបទ៖ បាន ចក់