ឧបនាយរដ្ឋមន្រ្តី រដ្ឋមន្រ្តីក្រសួងមហាផ្ទៃ ឯកឧត្តម ស សុខា បាន​ណែនាំ​ដល់​អភិបាល​ខេត្ត​ចំនួន​១១ ត្រូវធ្វើការត្រួតពិនិត្យឡើងវិញ ចំពោះដែនដីរបស់ខ្លួនដែលមានល្បែងជល់មាន់ ល្បែង​ផ្សង​សំណាង​ផ្សេងៗ និងល្បែងស៊ីសងខុសច្បាប់ជាច្រើនទៀត រួមទាំងបទល្មើស​មួយ​ចំនួន​ទៀត​ផង​ដែរ​។

ឯកឧត្តមឧបនាយករដ្ឋមន្រ្តី បានលើកឡើងថា ខេត្តចំនួន១១ដែលត្រូវបានគេរាយការណ៍ថា នៅ មាន​បទល្មើសច្រើនគួរឲ្យព្រួយបារម្ភនៅឡើយនោះ គឺមានខេត្តកំពង់ឆ្នាំង កំពង់ធំ ព្រះវិហារ ក្រចេះ ​ពោធិ៍សាត់ បាត់ដំបង ខេត្តកណ្តាល ត្បូងឃ្មុំ ព្រះសីហនុ តាកែវ និងព្រៃវែងជាដើម។

ឯកឧត្តមឧបនាយករដ្ឋមន្រ្តីក្រសួងមហាផ្ទៃបានសង្កត់ថា «ខ្ញុំសូមឲ្យខេត្តទាំង១១នេះ មេត្តា​សិក្សា​ឡើង​វិញ​ទៅ​លើកិច្ចការងារសន្តិសុខរបស់ខ្លួន ហើយសូមឲ្យចូលរួមពិភាក្សាជាមួយរដ្ឋបាល ខេត្ត​ក្នុង​គោលដៅ​ទប់ស្កាត់លើបញ្ហាទាំងអស់នេះ។ ក្នុងន័យនេះខ្ញុំគ្មានការស្តីបន្ទោសអ្វីនោះទេ ប៉ុន្តែ​សូម​ឲ្យ​ធ្វើការបន្តរឹតបន្តឹងចំពោះបញ្ហានេះ ជាពិសេសល្បែងផ្សងសំណាងខុសច្បាប់ និងជល​មាន់​ជា​ដើម។ល។ ដែលបញ្ហានេះកំពុងពុលនៅក្នុងសង្គម ដូច្នេះខ្ញុំ​សូម​ស្នើ​ទាក់​ទង​នឹង​បញ្ហា​ទាំង​នេះ»​។

ការលើកឡើងរបស់ឯកឧត្តមឧបនាយករដ្ឋមន្រ្តី រដ្ឋមន្រ្តី​ក្រសួង​មហាផ្ទៃ​នេះ​គឺបានធ្វើឡើងក្នុងពិធី​បើក​​សន្និបាតត្រួត​ពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់​ក្រសួង​មហាផ្ទៃនាថ្ងៃទី២៩ ខែកុម្ភៈ ឆ្នាំ២០២៤នេះនៅទីស្តីការក្រសួងមហាផ្ទៃ៕ អត្ថបទ៖ បាន ចក់