ក្រសួងសុខាភិបាលក្នុងតំបន់ហ៊ុមព័ទ្ធនេះបាននិយាយនៅថ្ងៃព្រហស្បតិ៍ (២៩ កុម្ភៈ) នេះថាមនុស្សជាង ៣០.០០០ នាក់ត្រូវបានសម្លាប់នៅក្នុងតំបន់ហ្កាហ្សា ចាប់តាំងពីសង្រ្គាមរបស់អ៊ីស្រាអែល ជាមួយក្រុមហាម៉ាស បានចាប់ផ្តើមនៅក្នុងខែតុលា ដោយជាព្រឹត្តិការណ៍ដ៏អាក្រក់មួយដែលកើតឡើងស្របពេលមានសម្ពាធអន្តរជាតិកាន់តែខ្លាំងលើអ៊ីស្រាអែលឱ្យបញ្ឈប់ការប្រយុទ្ធ និងភាពភ័យខ្លាចនៃការបង្ហូរឈាមបន្ថែមទៀតនៅទីក្រុង រ៉ាហ្វា (Rafah) ភាគខាងត្បូង។

ក្រសួងសុខាភិបាលនេះបាននិយាយនៅថ្ងៃព្រហស្បតិ៍ថា ចំនួនអ្នកស្លាប់សរុបចុងក្រោយបំផុតរបស់ជនជាតិប៉ាឡេស្ទីននេះបានកើតឡើងបន្ទាប់ពីមនុស្សយ៉ាងហោចណាស់ ៧៩ នាក់បានស្លាប់ក្នុងមួយពេលយប់នៅទូទាំងតំបន់ហ្កាហ្សាស្ទ្រីប ដែលហែកហួរដោយសង្រ្គាម។

ចំនួនអ្នកស្លាប់ដ៏ខ្ពស់នេះបង្ហាញពីភាពរភ័យខ្លាចនៃការរងទុក្ខកាន់តែច្រើននៅក្នុងទីក្រុង រ៉ាហ្វា ដែលមានមនុស្សជាងមួយលាននាក់កំពុងជ្រកកោន ហើយជាទីដែលអ៊ីស្រាអែលត្រូវបានគេរំពឹងថានឹងចាប់ផ្តើមការវាយលុកថ្មី។

ក្រសួងសុខាភិបាលរបស់ហ្កាហ្សា មិនបែងចែករវាងជនស៊ីវិល និងអ្នកប្រយុទ្ធទេ ប៉ុន្តែបាននិយាយនៅក្នុងព័ត៌មានថ្មីៗថាប្រហែល ៧០ ភាគរយនៃអ្នកស្លាប់បាត់បង់ជីវិតគឺជាស្ត្រី និងកុមារ។

អ៊ីស្រាអែលប៉ាន់ប្រមាណថា យុទ្ធជនហាម៉ាសប្រហែល ១០.០០០ នាក់ត្រូវបានសម្លាប់ចាប់តាំងពីថ្ងៃទី០៧ ខែតុលា នៅពេលដែលអ៊ីស្រាអែល បានប្រកាសសង្រ្គាមលើក្រុមសកម្មប្រយុទ្ធមួយនេះ៕