រដ្ឋមន្ត្រីការបរទេសអង់គ្លេសលោក ដេវីត កាមេរូន (David Cameron) បាននិយាយថា ច្បាប់សន្តិសុខថ្មីរបស់ទីក្រុងហុងកុងរំលោភលើកាតព្វកិច្ចអន្តរជាតិរបស់ខ្លួន រួមទាំងកិច្ចព្រមព្រៀងប្រគល់ដែលចុះហត្ថលេខាដោយចក្រភពអង់គ្លេស និងប្រទេសចិន។

លោកកាមេរូន បានថ្លែងនៅក្នុងសេចក្តីថ្លែងការណ៍មួយកាលពីថ្ងៃពុធថា សំណើច្បាប់នេះ នឹងរារាំងសេរីភាពនៃការថ្លែងការណ៍ ការបញ្ចេញមតិយោបល់ និងសារព័ត៌មាន។ លោកក៏បានលើកឡើងពីការព្រួយបារម្ភអំពីហានិភ័យនៃការងារដែលធ្វើឡើងដោយអង្គការអន្តរជាតិ នៅក្នុងទីក្រុងហុងកុង ដែលត្រូវបានចាត់ទុកថា «ការជ្រៀតជ្រែកពីបរទេស» ដែលគំរាមកំហែងដល់សកម្មភាពការទូត និងកុងស៊ុល និង         អវត្តមាននៃឯកសារយោងចំពោះការគ្រប់គ្រងដោយឯករាជ្យ។

នាយកប្រតិបត្តិហុងកុងលោក ចន លី (John Lee) បានស្នើច្បាប់នេះ ជាផ្លូវការ នៅថ្ងៃទី៣០ ខែមករា ជាមួយនឹងរយៈពេលពិគ្រោះយោបល់មួយខែ ដើម្បីអនុម័តច្បាប់សន្តិសុខរបស់ទីក្រុងនេះ រួមទាំងការបង្កើនកិច្ចខិតខំប្រឹងប្រែង ដើម្បីទប់ទល់នឹងការជ្រៀតជ្រែកពីបរទេស។

ច្បាប់នេះ នឹងគ្របដណ្តប់លើបទល្មើសនានា រួមទាំងអំពើក្បត់ជាតិ ការបះបោរ និងសកម្មភាពឌីជីថលដែលបង្កគ្រោះថ្នាក់ដល់សន្តិសុខជាតិ។ វាជាការបន្ថែមលើច្បាប់សន្តិសុខជាតិ ដែលដាក់ចេញដោយទីក្រុងប៉េកាំងក្នុងឆ្នាំ ២០២០ ដែលបានបំបិទសំឡេងប្រឆាំង និងលុបបំបាត់ក្រុមសកម្មជនជាច្រើន។

លោកកាមេរូន បានបញ្ជាក់ថា៖«មន្រ្តីរបស់ខ្ញុំ បានលើកឡើងពីកង្វល់របស់យើងជាលក្ខណៈឯកជនចំពោះ អាជ្ញាធរហុងកុង និងតាមរយៈដំណើរការពិគ្រោះយោបល់ជាសាធារណៈ» ដោយបន្ថែមថា លោកបាន«ជំរុញ»យ៉ាងខ្លាំងដល់រដ្ឋាភិបាលនៅទីនោះឲ្យ«ពិចារណាឡើងវិញនូវសំណើរបស់ពួកគេ ហើយចូលរួមក្នុងការពិគ្រោះយោបល់ពិតប្រាកដ និងប្រកបដោយអត្ថន័យជាមួយប្រជាជនហុងកុង»។