ប្រធានាធិបតីចិនលោក Xi Jinping បានសន្យាថា នឹងលើកទឹកចិត្តក្រុមហ៊ុនចិនឲ្យវិនិយោគនៅក្នុងប្រទេសសៀរ៉ាឡេអូនដែលសម្បូរទៅដោយធនធានរ៉ែ តែមានសេដ្ឋកិច្ចទន់ខ្សោយ ដើម្បីជាផ្នែកមួយនៃការជំរុញរយៈពេលវែងរបស់ទីក្រុងប៉េកាំង ក្នុងការធ្វើឲ្យទំនាក់ទំនងសេដ្ឋកិច្ច និងនយោបាយកាន់តែស៊ីជម្រៅជាមួយប្រទេសអាហ្វ្រិកមួយនេះ។

អំឡុងជួបជាមួយប្រធានាធិបតីសៀរ៉ាឡេអូនលោក Julius Maada Bio ដែលកំពុងបំពេញទស្សនកិច្ច នៅទីក្រុងប៉េកាំង កាលពីថ្ងៃពុធ (ទី២៨ ខែកមុ្ភៈ) លោក Xi បានប្រាប់ថា ប្រទេសចិនតែងតែចាត់ទុកកិច្ចសហប្រតិបត្តិការជាមួយបណ្តាប្រទេសអាហ្វ្រិក ជាមូលដ្ឋានគ្រឹះនៃគោលនយោបាយការបរទេសរបស់ខ្លួន ហើយលោកបានបន្ថែមថា ទំនាក់ទំនងរបស់ខ្លួនជាមួយសៀរ៉ាឡេអូន គឺជា «គំរូនៃការរួបរួម និងកិច្ចសហប្រតិបត្តិការ» សម្រាប់រដ្ឋអាហ្វ្រិកដទៃទៀត។

ចំណែកលោក Bio ដែលអមដំណើរដោយរដ្ឋមន្ត្រីក្រសួងហិរញ្ញវត្ថុ និងរ៉ែ ក្នុងដំណើរទស្សនកិច្ចរបស់លោកនេះ កំពុងសង្ឃឹមថា នឹងអាចទាក់ទាញក្រុមហ៊ុនចិនកាន់តែច្រើនឲ្យធ្វើដំណើរទៅកាន់រដ្ឋអាហ្វ្រិកខាងលិចមួយនេះ ហើយទទួលបាននូវការសន្យាវិនិយោគ ដើម្បីលើកកម្ពស់ហេដ្ឋារចនាសម្ព័ន្ធមិនល្អរបស់ខ្លួន។

យ៉ាងណាក្ដី បើយោងតាមសេចក្តីថ្លែងការណ៍ពីការិយាល័យរដ្ឋាភិបាលសៀរ៉ាឡេអូន បានឲ្យដឹងថា អំឡុងជំនួបនោះ ប្រទេសចិនបានប្រកាសផ្តល់ជំនួយផ្នែកសេដ្ឋកិច្ច និងបច្ចេកទេសចំនួន ៥០លានយ័ន (៦,៩៥លានដុល្លារ) លុបចោលបំណុលចំនួន ២០លានយ័ន (២,៧៨លានដុល្លារ) និងផ្ដល់ជំនួយស្បៀងអាហារចំនួន ១.៥០០តោន សម្រាប់ប្រទេសសៀរ៉ាឡេអូន៕