ចំនួននាវាកងជីវពលតាមដែនសមុទ្ររបស់ចិន ជុំវិញតំបន់ភូមិសាស្ត្រសំខាន់ៗ នៅទូទាំងសមុទ្រចិនខាងត្បូង បានកើនឡើង ៣៥ភាគរយ ក្នុងឆ្នាំ២០២៣ ខណៈដែលទីក្រុងប៉េកាំងបានបន្តពង្រឹងវត្តមានរបស់ខ្លួន ក្នុងពេលមានការកើនឡើងនូវភាពតានតឹង ក្នុងតំបន់។ នេះបើយោងតាមទិន្នន័យរបស់អង្គភាព Asia Maritime Transparency Initiative (Amti) ដែលមានមូលដ្ឋាននៅទីក្រុងវ៉ាស៊ីនតោន សហរដ្ឋអាមេរិក។

ដោយផ្អែកលើរូបភាពផ្កាយរណបនៃតំបន់ភូមិសាស្ត្រចំនួន៩ នៅក្នុងដែនសមុទ្រនេះ ក្នុងនោះរួមទាំងតំបន់ថ្មប៉ប្រះទឹកផងដែរ របាយការណ៍ដែលបានចេញផ្សាយ កាលពីថ្ងៃពុធ (ទី២៨ ខែកុម្ភៈ) បានរកឃើញថាជាមធ្យមមាននាវាកងជីវពលចំនួន ១៩៥គ្រឿង បង្ហាញវត្តមានក្នុងពេលណាមួយ។

ការកើនឡើងពីឆ្នាំមុនត្រូវបានកើតឡើងអមដោយ «ការប្រែប្រួលខ្លាំង» នៃចំនួននាវា ដែលធ្វើដំណើរទៅតំបន់ថ្មប៉ប្រះទឹក Mischief Reef នៅរដូវក្តៅឆ្នាំ២០២៣ នៅពេលដែលទូកជាង ១៨០គ្រឿង ត្រូវបានគេសង្កេតឃើញប្រមូលផ្តុំនៅទីនោះ ចាប់តាំងពីខែកក្កដាមក។ តំបន់ថ្មប៉ប្រះទឹកនេះ ក៏ត្រូវបានទាមទារផងដែរពីសំណាក់ប្រទេសហ្វីលីពីន និងវៀតណាម។

របាយការណ៍នេះបានលើកឡើងថា៖ «ទិន្នន័យបង្ហាញថា កងជីវពលរបស់ប្រទេសចិន ធ្វើសកម្មភាពក្នុងកម្រិតខ្ពស់។ ហើយហេតុផលគឺមិនទាន់ច្បាស់លាស់នោះទេ សម្រាប់ការកើនឡើងនេះ ដែលជាភាពមិនធម្មតាមួយ បើប្រៀបធៀបទៅនឹងកម្រិតខ្ពស់បំផុត កាលពីឆ្នាំមុននោះ ដែលមាននាវាតែ ៣៧គ្រឿងប៉ុណ្ណោះ នៅតំបន់ថ្មប៉ប្រះទឹក Mischief នេះ»។

យ៉ាងណាក្ដី គំនិតផ្តួចផ្តើមនេះដែលជាផ្នែកមួយនៃមជ្ឈមណ្ឌលដើម្បីការសិក្សាយុទ្ធសាស្ត្រ និងអន្តរជាតិ ពិពណ៌នាអំពីកងជីវពលដែនសមុទ្ររបស់ចិនថា ជា «កម្លាំងនាវាដែលមានគោលបំណងចូលរួមក្នុងការនេសាទពាណិជ្ជកម្ម តែប្រតិបត្តិការរួមជាមួយនឹងការអនុវត្តច្បាប់ និងយោធាចិន ដើម្បីសម្រេចបាននូវគោលបំណងនយោបាយ នៅក្នុងដែនទឹកដែលមានជម្លោះ»៕