ភ្នំពេញ៖ ឯកឧត្តមឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការអន្តរជាតិ នៅថ្ងៃទី២៦ ខែកុម្ភៈ ឆ្នាំ២០២៤ បានអញ្ជើញថ្លែងសុន្ទរកថាតាមរយៈវីដេអូនៅក្នុងកិច្ចប្រជុំកម្រិតខ្ពស់នៃសម័យប្រជុំលើកទី៥៥ របស់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ។ នេះបើតាមសេចក្តីប្រកាសព័ត៌មានរបស់ក្រសួងការបរទេស ចុះថ្ងៃទី២៩ ខែកុម្ភៈ ឆ្នាំ២០២៤នេះ។

សម័យប្រជុំលើកទី៥៥នេះ មានឥស្សរជនជាន់ខ្ពស់ជាង១០០រូប មកពីបណ្តាប្រទេស និងអង្គការអន្តរជាតិជាច្រើន បានចូលរួមក្នុងកិច្ចពិភាក្សាប្រចាំឆ្នាំរួមទាំងប្រទេសសមាជិកអាស៊ានចំនួន៧ រួមមាន កម្ពុជា ឥណ្ឌូនេស៊ី ឡាវ ម៉ាឡេស៊ី ហ្វីលីពីន ថៃ និងវៀតណាម។

កិច្ចប្រជុំកម្រិតខ្ពស់នេះ បានផ្តល់នូវវេទិកាសម្រាប់រដ្ឋាភិបាល ឬ តំណាងរដ្ឋលើកឡើងពីកិច្ចការអាទិភាព សមិទ្ធផល និងការប្តេជ្ញាចិត្តដើម្បីដោះស្រាយបញ្ហាប្រឈមសិទ្ធិមនុស្ស៕ ដោយ ៖ ឧត្ដម