ប្រទេសស្រីលង្កាបានសម្រេចបញ្ឈប់ផ្តល់ទិដ្ឋាការរយៈពេលវែង ដោយឥតគិតថ្លៃដល់ជនជាតិរុស្ស៊ី និងអ៊ុយក្រែន ដែលបានរស់នៅក្នុងប្រទេសកោះមហាសមុទ្រឥណ្ឌានេះរយៈពេល ២ឆ្នាំកន្លងមកនេះ។ នេះបើតាមការឲ្យដឹងពីមន្ត្រីរដ្ឋាភិបាល នៅថ្ងៃព្រហស្បតិ៍ (ទី២៩ ខែកុម្ភៈ) នេះ។

ចាប់តាំងពីទីក្រុងមូស្គូបានលុកលុយអ៊ុយក្រែន ក្នុងខែកុម្ភៈ ឆ្នាំ២០២២ ស្រីលង្កាបានអនុញ្ញាតឲ្យជនជាតិរុស្ស៊ី និងអ៊ុយក្រែនស្នាក់នៅក្នុងប្រទេស ដោយមិនបង់ប្រាក់ សម្រាប់ថ្លៃទិដ្ឋាការ ប៉ុន្តែឥឡូវនេះពួកគេនឹងត្រូវបង់ថ្លៃសេវា។

រដ្ឋមន្ត្រីសន្តិសុខសាធារណៈ លោក Tiran Alles បានប្រាប់សារព័ត៌មាន Reuters ថា តម្លៃបង់សេវា គឺប្រហែល ៥០ដុល្លារ សម្រាប់ការសុំទិដ្ឋាការរយៈពេល ៣០ថ្ងៃ ប្រសិនបើពួកគេចង់ស្នាក់នៅក្នុងប្រទេសស្រីលង្កា។

កាលពីសប្តាហ៍មុន អាជ្ញាធរអន្តោប្រវេសន៍បាននិយាយថា ពួកគេកំពុងបញ្ចប់គម្រោងទិដ្ឋាការរយៈពេលវែងដោយឥតគិតថ្លៃ សម្រាប់ពលរដ្ឋរុស្ស៊ី និងអ៊ុយក្រែន ដោយកំណត់ថ្ងៃផុតកំណត់នៅថ្ងៃទី៧ ខែមីនា សម្រាប់ការចាកចេញរបស់អ្នកដែលគ្មានទិដ្ឋាការថ្មី នៅក្នុងសេចក្តីប្រកាសដំណឹងមួយ ដែលការជូនដំណឹងនេះបានបង្កមានការអត្ថាធិប្បាយនៅលើបណ្ដាញសង្គម។

លោក Priantha Fernando ប្រធានស្ថាប័នទេសចរណ៍របស់ប្រទេសកោះនេះ បាននិយាយថា ជនជាតិរុស្សី និងអ៊ុយក្រែនប្រហែល ៣០០ ទៅ ៤០០នាក់ ត្រូវបានគេប៉ាន់ស្មានថា បានស្នាក់នៅក្នុងប្រទេសស្រីលង្កា គិតចាប់តាំងពីខែកុម្ភៈ ឆ្នាំ២០២២ មក៕