បន្ទាយមានជ័យ​ ៖​ រដ្ឋបាលខេត្តបន្ទាយមានជ័យ​ និងអាជ្ញាធរជាតិប្រយុទ្ធប្រឆាំងគ្រឿងញៀន​ បាន​រៀបចំ​ពិធីផ្សព្វផ្សាយ​ អប់រំ​ ណែនាំដល់សិស្សានុសិស្ស​ និងសហគមន៍​ លើប្រធានបទ​ "​ គ្រឿងញៀន​ ច្បាប់ចរាចរណ៍​ និងក្មេងទំនើង"​ ជូនដល់សិស្សានុសិស្ស​ ជាង១០០០នាក់​ នៅ​វិទ្យាល័យ​សម្តេចឪ​ (សាលាលើ)​ ស្ថិតនៅភូមិតារាងបាល់​ សង្កាត់កំពង់ស្វាយ​ ក្រុងសិរីសោភ័ណ​ ខេត្ត​បន្ទាយមានជ័យ​ នាព្រឹកថ្ងៃទី០១​ ខែមីនា​ ឆ្នាំ២០២៤។

ក្នុងឱកាសនោះលោក​ យឹម​ សំណាង​ អភិបាលរងខេត្តបន្ទាយមានជ័យ​ បានធ្វើ​ការ​ណែនាំ​ដល់​សិស្សានុសិស្ស​បានយល់កាន់តែច្បាស់ពីផលប៉ះពាល់គ្រឿងញៀន​ និងបានសង្កត់ធ្ងន់​ ថា បើ​ស្រឡាញ់​ខ្លួនឯង​ ស្រលាញ់អនាគត​ ស្រឡាញ់ក្រុមគ្រួសារ​ និងសង្គមជាតិ​ ក្មួយៗសិស្សានុសិស្ស​ត្រូវ​ចៀសឱ្យឆ្ងាយអំពីគ្រឿងញៀន។ លោកបានបញ្ជាក់ថា​ បច្ចុប្បប្រមុខរាជរដ្ឋាភិបាលកម្ពុជា​ សម្ដេចធិបតី​ ហ៊ុន​ ម៉ាណែត​ បានដាក់ចេញនូវបទបញ្ជា​ក្នុងការធ្វើតេស្ត​រក​សារ​ធាតុ​ញៀន​ទៅ​លើ​មន្ត្រី​រាជ​ការស្ថាប័នពាក់ព័ន្ធទូទាំងប្រទេសកម្ពុជា​ បើ​ក្នុងករណីរកឃើញថា មន្ត្រី ណារកឃើញ​មាន​សារ​ធាតុ​ញៀន​ និងត្រូវបណ្ដេញចេញពីក្របខ័ណ្ឌ។​ លោកបន្តថា​ ក្នុងនាមយើង​ជា​យុវជន​ជំនាន់​ក្រោយ​ ជាទំពាំងស្នងឫស្សី​ លោកបានធ្វើការណែនាំដល់ក្មួយៗសិស្សានុសិស្ស​ ត្រូវ​ធ្វើ​ការ​ផ្សព្វ​ផ្សាយ​អំពីផលប៉ះពាល់ នៃការប្រើប្រាស់គ្រឿងញៀន​ ដល់ក្រុមគ្រួសារ​ បងប្អូនសហគមន៍ យល់​អំពី​ផលប៉ះពាល់​ និងវាងផលវិបាកនៃការប្រើប្រាស់គ្រឿងញៀន។

មួយវិញទៀត​ត្រូវចូលរួមគោរពច្បាប់ចរាចរណ៍ផ្លូវគោក​ឱ្យបានគ្រប់ៗគ្នា​ ពីព្រោះ​បញ្ហា​គ្រោះ​ថ្នាក់​ចរាចរណ៍​តែង​តែកើតមានដោយសារតែការមិនគោរពច្បាប់​ ការបើកបរ​មិនពាក់មួកសុវត្ថិភាព បើកបរ​ក្នុងល្បឿនលឿន​ សេពគ្រឿងស្រវឹងជាដើម។ ដូច្នេះ​សូម​ឱ្យ​សិស្សានុសិស្ស​ទាំង​អស់​ចូល​រួម​គោរព​ច្បាប់​ចរាចរណ៍ឱ្យបានគ្រប់ៗគ្នា​ បើកបរម៉ូតូត្រូវពាក់មួយសុវត្ថិភាពឱ្យបានគ្រប់គ្នា៕​ អត្ថបទ​ រឿង​ ចន្ទ្រា