នៅថ្ងៃស្អែកនេះ គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប នឹងចាប់​ផ្តើម​ចុះ​បញ្ជី​គណបក្ស​នយោបាយ និងបេក្ខជនឈរ​ឈ្មោះ​បោះឆ្នោត​ចូលរួម​ការ​បោះឆ្នោត​ជ្រើសរើស​ក្រុម​ប្រឹក្សា​រាជធានី-ខេត្ត ក្រុង-ស្រុក និងខណ្ឌ អាណ្ណត្តិទី៤ ឆ្នាំ២០២៤។

ឯកឧត្តម ឌឹម សុវណ្ណារុំ សមាជិក និងជាប្រធាន​ក្រុម​អ្នក​នាំ​ពាក្យ​គណៈកម្មាធិការ​ជាតិ​រៀបចំ​ការ​បោះឆ្នោត ​(គ.ជ.ប) នៅថ្ងៃទី១ ខែមីនា ឆ្នាំ២០២៤ បានដឹកនាំ​កិច្ចប្រជុំ​ផ្សព្វផ្សាយ​ជាមួយ​ភាគី​ពាក់ព័ន្ធ​ស្តីពី​ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុម​ប្រឹក្សា​ស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ ដែលមានការចូលរួមពីបណ្តាក្រសួង-ស្ថាប័ន តំណាងគណបក្សនយោបាយ និងអង្គការសង្គមស៊ីវិល។

ឯកឧត្តម បានឱ្យដឹងថា ការចុះបញ្ជីគណបក្សនយោបាយឈរឈ្មោះបោះឆ្នោត និង​បញ្ជី​បេក្ខជន​ឈរ​ឈ្មោះជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុម​ប្រឹក្សា​ខណ្ឌ អាណត្តិទី៤ ឆ្នាំ២០២៤ មានរយៈពេល៥ថ្ងៃ ដោយត្រូវចាប់ផ្តើមពីថ្ងៃទី២ ខែមីនា ដល់​ថ្ងៃ​ទី៦ ខែមីនា ឆ្នាំ២០២៤។

ឯកឧត្តម បានឱ្យដឹងទៀតថា ការចុះបញ្ជីគណបក្សនយោបាយឈរឈ្មោះបោះឆ្នោត និង​បញ្ជី​បេក្ខជនឈរឈ្មោះ ត្រូវធ្វើឡើងតាមទម្រង់បែបបទលេខ ១០០៨ ដែលកំណត់ដោយ គ.ជ.ប។ ឯកឧត្តម បញ្ជាក់ថា ការមានសិទ្ធិឈរឈ្មោះជាបេក្ខជន គឺប្រជាពលរដ្ឋខ្មែរទាំងពីរភេទ ដែល​មាន​បំណង​ឈរ​ឈ្មោះជាបេក្ខជនសម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៤ ត្រូវ​បំពេញ​លក្ខ​ខណ្ឌ និងមានលក្ខណៈសម្បត្តិដូចជា មានសញ្ជាតិខ្មែរពីកំណើត, អាយុយ៉ាងតិច២៥ឆ្នាំ គិត​ដល់​ថ្ងៃ​ទី២៦ ខែឧសភា ឆ្នាំ២០២៤, បានអនុវត្ត​សិទ្ធិបោះឆ្នោត​ដោយ​បាន​បោះឆ្នោត សម្រាប់​ការ​បោះឆ្នោត​ជា​សកល លើកចុងក្រោយ ដែលរៀបចំឡើងដោយ គ.ជ.ប លើកលែងតែ​ករណី​ដែល​ការ​មិន​អាច​អនុវត្តសិទ្ធិបោះឆ្នោតនេះមានមូលហេតុសមស្រប។

ឯកឧត្តម បានបញ្ជាក់ទៀតថា ចំពោះលក្ខខណ្ឌ និងបែបបទ​ក្នុង​ការ​ចុះ​បញ្ជី​គណបក្ស​នយោបាយ​ឈរ​ឈ្មោះ​បោះឆ្នោត និងបញ្ជីបេក្ខជនឈរឈ្មោះ គឺគណបក្សនយោបាយ ត្រូវបំពេញ​ពាក្យ​សុំ​ចុះ​បញ្ជី​គណបក្ស​នយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះចំនួន២ច្បាប់, ពាក្យ​សុំ​ត្រូវ​ចុះហត្ថលេខាដោយប្រធានគណបក្ស នយោបាយ ឬតំណាង​ដែល​បាន​ទទួល​ការ​ផ្ទេរ​សិទ្ធិ​ជា​លាយ​លក្ខណ៍អក្សរពីប្រធានគណបក្សនយោបាយនោះ។

ចំពោះពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ឯកឧត្តម បានឱ្យដឹងទៀតថា ឯកសារតម្រូវ​ដែល​ត្រូវ​ភ្ជាប់​ជា​សេចក្តី​ចម្ល​ង​លិខិត​បញ្ជាក់​ការ​ចុះ​បញ្ជី​គណបក្ស​នយោបាយនៅក្រសួងមហាផ្ទៃ ,សេចក្តីចម្លងប្រកាស​ស្តីពី​ការ​ចុះ​ឈ្មោះក្នុ​ង​បញ្ជី​គណបក្ស​នយោបាយនៅក្រសួងមហាផ្ទៃ ដែលមានបញ្ជាក់​នីត្យានុកូល​កម្ម​ដោយ​អង្គភាព​ច្រក​ចេញ​ចូល​តែ​មួយ​នៃរដ្ឋបាលរាជធានី ខេត្ត ឬការិយាល័យច្រកចេញចូលតែមួយនៃរដ្ឋបាលក្រុង ស្រុក និងខណ្ឌ ។

សូមជម្រាបថា ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុម​ប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ នឹងប្រព្រឹត្តទៅនាថ្ងៃទី២៥ ខែឧសភា ឆ្នាំ​២០២៤​ខាងមុខ៕