ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម បានឲ្យដឹងថា នៅថ្ងៃទី១ ខែមីនា ឆ្នាំ២០២៤នេះ បានដុតកម្ទេចចោលឆ្អឹងជំនីជ្រូក និងជើងជ្រូកបង្កក ចំនួន ២តោន ៣៥២គីឡូក្រាម ត្រូវបានដុតកម្ទេចចោល ក្រោយពិនិត្យឃើញថា មិនមានលក្ខណៈសមស្របតាមស្តង់ដាសាច់បង្កក។ 

ផេកផ្លូវការរបស់អគ្គនាយកដ្ឋាន ក.ប.ប. បានសសេរក្នុងបណ្តាញសង្គមហ្វេសប៊ុកថា មន្រ្តីស៊ើបអង្កេត នៃសាខា ក.ប.ប. ខេត្តបាត់ដំបង សហការជាមន្រ្តីជំនាញគយចល័តតំបន់៤ ស្ថិតនៅតំបន់អូរតាគី បានធ្វើការត្រួតពិនិត្យលើឆ្អឹងជំនីជ្រូក និងជើងជ្រូកបង្កកដែលបាននាំចូល ដោយបានពិនិត្យឃើញថា មិនសមស្របតាមស្តង់ដាសាច់បង្កកឡើយ។ 

ប្រភពដដែលនេះ បានបញ្ជាក់បន្ថែមថា បន្ទាប់ពីបានធ្វើការពិនិត្យរួចឃើញថាមិនមានលក្ខណៈសមស្រប មន្រ្តីជំនាញសាខា ក.ប.ប. ខេត្តបាត់ដំបង និងមន្រ្តីជំនាញគយចល័តតំបន់៤ បានធ្វើការដុតកម្ទេចចោលនូវឆ្អឹងជំនីជ្រូក និងជើងជ្រូកបង្កក ទាំងនោះតាមនីតិវិធី។

ការដុតកម្ទេចនេះ ស្ថិតក្រោមការសម្របសម្រួលពីលោក ទុត វីនីត ព្រះរាជអាជ្ញារង នៃអយ្យការអមសាលាដំបូងខេត្ត និងមានការចូលរួមពីមន្រ្តីជំនាញគយចល័តតំបន់៤ និងអាជ្ញាធរដែនដីផងដែរ៕

អត្ថបទ ឈិត បូរ៉ាវី