រំញ័រនៃការរញ្ជួយដី ជាបន្តបន្ទាប់ ត្រូវបានគេសង្កេតឃើញនៅឆ្នេរសមុទ្រភាគខាងកើតនៃខេត្ត Chiba ក្បែរទីក្រុងតូក្យូ ចាប់តាំងពីថ្ងៃអង្គារ។ មន្ត្រីប្រទេសជប៉ុន កំពុងជំរុញប្រជាជននៅក្នុងតំបន់ ឱ្យប្រុងប្រយ័ត្នចំពោះសកម្មភាពរញ្ជួយដីបន្ថែមទៀត។ មន្ត្រីទីភ្នាក់ងារឧតុនិយមជប៉ុន បាននិយាយថា រញ្ជួយដីកម្រិត ៥,២ រ៉ិចទ័រ បានវាយប្រហារតំបន់នេះ នៅម៉ោងប្រហែល ៥:៤៣នាទីព្រឹកថ្ងៃសុក្រនេះ។ វាជាការរញ្ជួយខ្លាំងបំផុត ក្នុងការរញ្ជួយដីជាបន្តបន្ទាប់ ដែលស្ថិតនៅចំកណ្តាលឆ្នេរភាគខាងកើតនៃ ខេត្ត Chiba។

រំញ័រនៃរញ្ជួយដីដែលមានអាំងតង់ស៊ីតេកម្រិត ៤ លើមាត្រដ្ឋានប្រទេសជប៉ុនពីកម្រិត ០ ដល់ ៧ ត្រូវបានចុះបញ្ជីនៅក្នុងស្រុកមួយនៃខេត្ត Saitama ភាគខាងជើងទីក្រុងតូក្យូ និងនៅតំបន់មួយចំនួននៅខេត្ត Chiba។

មន្ត្រីទីភ្នាក់ងារ បាននិយាយថា នៅក្នុងតំបន់ដូចគ្នានេះកាលពីពេលមុន កម្រិតខ្ពស់នៃសកម្មភាពរំញ័រនៃរញ្ជួយដី បានបន្តរយៈពេលមួយសប្តាហ៍ ទៅច្រើនខែ បន្ទាប់ពីការរញ្ជួយដីកម្រិត ៥ រ៉ិចទ័រ។

លោក Hirata Naoshi សាស្ត្រាចារ្យ នៅសាកលវិទ្យាល័យតូក្យូ និយាយថា លោកមិនគិតថា រំញ័រជាបន្តបន្ទាប់នាពេលថ្មីៗនេះ នឹងនាំឱ្យមានការរញ្ជួយដីធំភ្លាមៗនោះទេ។ ប៉ុន្តែលោកបាននិយាយថា ហេតុការណ៍នៃការរញ្ជួយដីកម្រិត ៧ រ៉ិចទ័រ វាយប្រហារតំបន់ Kanto ភាគខាងត្បូង ដែលរួមទាំងទីក្រុងតូក្យូ ក្នុងរយៈពេល ៣០ឆ្នាំមកនេះ គឺមាន៧០ភាគរយ។ លោកនិយាយថា នេះមានន័យថា ការរញ្ជួយដីកម្រិតនោះ អាចវាយប្រហារតំបន់នេះគ្រប់ពេលវេលា។ លោក Hirata និយាយថា ការរញ្ជួយដីកម្រិត៧ រ៉ិចទ័រ អាចបណ្តាលឱ្យមានរលកយក្សស៊ូណាមិ។