មន្ត្រីរដ្ឋាភិបាលបាននិយាយកាលពីថ្ងៃព្រហស្បតិ៍ (២៩ កុម្ភៈ) ប្រទេសស្រីលង្កា បានសម្រេចបញ្ឈប់ការផ្តល់ទិដ្ឋាការរយៈពេលវែងដោយឥតគិតថ្លៃដល់ជនជាតិរុស្ស៊ី និងអ៊ុយក្រែន ដែលបានរស់នៅក្នុងប្រទេសកោះមហាសមុទ្រឥណ្ឌាមួយនេះរយៈពេលពីរឆ្នាំកន្លងមក។

ចាប់តាំងពីទីក្រុងមូស្គូ បានឈ្លានពានអ៊ុយក្រែន ក្នុងខែកុម្ភៈ ឆ្នាំ២០២២មក ប្រទេសស្រីលង្កាបានអនុញ្ញាតឱ្យជនជាតិរុស្ស៊ី និងអ៊ុយក្រែន ស្នាក់នៅក្នុងប្រទេសដោយមិនបង់ប្រាក់សម្រាប់ទិដ្ឋាការ ប៉ុន្តែឥឡូវនេះពួកគេនឹងត្រូវបង់ថ្លៃសេវា។

អត្រានេះគឺប្រហែល ៥០ ដុល្លារសម្រាប់ទិដ្ឋាការរយៈពេល ៣០ ថ្ងៃ ប្រសិនបើពួកគេចង់ស្នាក់នៅប្រទេសស្រីលង្កា នេះបើយោងតាមរដ្ឋមន្ត្រីសន្តិសុខសាធារណៈ លោក ទីរ៉ាន អាឡេស (Tiran Alles) បានប្រាប់សារព័ត៌មានរ៉យទ័រ។

កាលពីសប្តាហ៍មុន អាជ្ញាធរអន្តោប្រវេសន៍បាននិយាយថា ពួកគេកំពុងបញ្ចប់គម្រោងទិដ្ឋាការរយៈពេលវែងដោយឥតគិតថ្លៃសម្រាប់ជនជាតិរុស្ស៊ី និងអ៊ុយក្រែន ដោយកំណត់កាលបរិច្ឆេទថ្ងៃទី០៧ ខែមីនា សម្រាប់ការចាកចេញរបស់អ្នកដែលមិនមានទិដ្ឋាការថ្មី នៅក្នុងសេចក្តីជូនដំណឹងដែលបង្កឱ្យមានបញ្ចេញមតិជាច្រើនលើប្រព័ន្ធផ្សព្វផ្សាយសង្គម។

លោក ប្រានថា ហ្វឺណានដូ (Priantha Fernando) ប្រធានស្ថាប័នទេសចរណ៍របស់ប្រទេសកោះនេះបាននិយាយថា ជនជាតិរុស្សី និងអ៊ុយក្រែនប្រមាណពី ៣០០ នាក់ទៅ ៤០០ នាក់ត្រូវបានគេប៉ាន់ស្មានថាបានស្នាក់នៅក្នុងប្រទេសស្រីលង្កា ចាប់តាំងពីខែកុម្ភៈ ឆ្នាំ២០២២ មក៕