វេទិកាប្រព័ន្ធផ្សព្វផ្សាយរបស់ក្រុមហ៊ុន មេតា (Meta) បាននិយាយថា ខ្លួននឹងបញ្ឈប់ការបង់ប្រាក់ដល់ស្ថាប័នផ្សព្វផ្សាយព័ត៌មានអូស្ត្រាលី សម្រាប់មាតិការបស់ពួកគេដែលលេចឡើងនៅលើបណ្ដាញសង្គម ហ្វេសប៊ុក ដោយធ្វើឱ្យទីក្រុងកង់បេរ៉ា ដែលឈានមុខគេក្នុងពិភពលោកជាមួយនឹងច្បាប់ដែលបង្ខំឱ្យក្រុមហ៊ុនអ៊ីនធឺណិតខ្នាតយក្សជាច្រើនចុះកិច្ចព្រមព្រៀងអាជ្ញាប័ណ្ណ មានការមិនពេញចិត្តជាខ្លាំង។

ស្ថាប័នផ្សាយព័ត៌មាន និងរដ្ឋាភិបាលជាច្រើន ដូចជាប្រទេសអូស្ត្រាលី បានប្រកែកថាក្រុមហ៊ុនបច្ចេកវិទ្យាធំៗដូចជា ហ្វេសប៊ុក និង ហ្គូហ្គល (Google) ទទួលបានអត្ថប្រយោជន៍ដោយអយុត្តិធម៌ នៅពេលដែលតំណភ្ជាប់ទៅអត្ថបទព័ត៌មានលេចឡើងនៅលើវេទិការបស់ពួកគេ។

រដ្ឋមន្ត្រីក្រសួងទំនាក់ទំនង លោកស្រី មីឆល រ៉ូលែន (Michelle Rowland) និងជំនួយការហេរញ្ញិក លោក ស្ទេហ្វិន ចូនស៍ (Stephen Jones) បាននិយាយនៅក្នុងសេចក្តីថ្លែងការណ៍រួមមួយថា «ការសម្រេចរបស់ក្រុមហ៊ុន មេតា ក្នុងការឈប់បង់ប្រាក់សម្រាប់មាតិកាព័ត៌មាននៅក្នុងយុត្តាធិការមួយចំនួន គឺតំណាងឱ្យការលុបចោលការប្តេជ្ញាចិត្តរបស់ខ្លួនចំពោះនិរន្តរភាពនៃប្រព័ន្ធផ្សព្វផ្សាយព័ត៌មានអូស្ត្រាលី»។

ការសម្រេចនេះអាចប៉ះពាល់ដល់ប្រភពចំណូលដ៏សំខាន់សម្រាប់ប្រព័ន្ធផ្សព្វផ្សាយដ៏ធំបំផុតរបស់ប្រទេសអូស្ត្រាលីពី រាប់ចាប់ពីស្ថាប័ន ញ៉ូវស៍ ខប (News Corp) រហូតដល់ក្រុមហ៊ុនសារជីវកម្មផ្សព្វផ្សាយ ABC ដែលបានទទួលអត្ថប្រយោជន៍ពីច្បាប់ឆ្នាំ២០២១ ដែលបានបង្ខំឱ្យក្រុមហ៊ុន មេតា និងក្រុមហ៊ុនមេ អាល់ហ្វាបេត (Alphabet) របស់ Google ចូលទៅក្នុងកិច្ចព្រមព្រៀងផ្តល់អាជ្ញាប័ណ្ណ៕