ភ្នំពេញ ៖ ដើម្បីរួមគ្នាលើកកម្ពស់ការថែរក្សាប្រពៃណី ទំនៀម ទម្លាប់ កេរមរតកដូនតា និង ផលិតផលវប្បធម៌ខ្មែរ

ក្រសួងវប្បធម៌និងវិចិត្រសិល្បះនៅថ្ងៃនេះបើកការតាំង ពិព័រណ៍សិប្បកម្មខ្មែរ អមនៃពិធីរាត្រីសមោសរក្រោម ប្រធានបទ “សំពត់បត់ខ្មែរ” ដោយបើកជូនសាធារណជនចូលទស្សនាដោយសេរីចាប់ពីថ្ងៃទី១ ខែមីនា ឆ្នាំ២០២៤ នេះរហូតដល់ថ្ងៃទី ៣ ខែមីនាតទៅចាប់ពីម៉ោង៩ ព្រឹករហូត ដល់ម៉ោង៦ ល្ងាច នៅសាល សន្និសីទចតុម្មុខ, រាជធានីភ្នំពេញ។

   លោក រឿង សារ៉េត ប្រធានស្តីទីនាយកដ្ឋានអភិវឌ្ឍន៍វប្បធម៌ នៃក្រសួងវប្បធម៌និងវិចិត្រសិល្បៈបានឲ្យដឹងថា ពិព័រណ៍សិប្បកម្មខ្មែរ ដែលបើកសម្ពោធក្នុងថ្ងៃនេះ គឺជាពិព័រណ៍លើកដំបូងដែលរៀបចំឡើងក្រោយវិបត្តិកូវីដ-១៩។ 

 កម្មវិធីនេះរៀបចំ ឡើងក្នុងគោលបំណងបង្កើតឱកាសជូនសិប្បករក្នុងស្រុកផ្សព្វផ្សាយនូវស្នាដៃផលិតផលរបស់ខ្លួនព្រមទាំងពង្រីកទំនាក់ទំនងទីផ្សារ ជាពិសេសបង្កើតជាវេទិកាមិត្តភាពមួយដែលសិប្បករខ្មែរនិងអតិថិជនអាចស្វែង យល់និងទទួលចំណេះដឹងទូទៅអំពីសិប្បកម្មប្រពៃណីខ្មែរ។ លោកបន្តថា ចំពោះការរៀបចំទូទៅនៃពិព័រណ៍នេះគឺជាគំនិតផ្តួចផ្តើមរបស់ថ្នាក់ដឹកនាំក្រសួងដែលមានអគ្គនាយកដ្ឋានបច្ចេកទេសវប្បធម៌ជាសេនាធិការ ដែលយកចិត្តទុកដាក់គាំទ្រនិងបើកឱកាសទូលាយដល់បណ្តាសិប្បករនិងសហគមន៍សិប្បកម្មផ្សេងៗតាំងបង្ហាញស្នាដៃ និងផលិតផលសិប្បកម្មខ្លួនជូនសាធារណជនទស្សនា និងស្វែងយល់។ដោយសិប្បករនិងសហគមន៍សិប្បកម្មចូលរួមតាំងបង្ហាញសរុបមានចំនួន១៦ ស្តង់មកពីរាជធានីភ្នំពេញ និង ខេត្តចំនួន៨ គឺកំពង់ចាមបាត់ដំបង តាកែវសៀមរាប កណ្តាលពោធិសាត់ រតនគិរី និងបន្ទាយមានជ័យ។ ចំពោះផលិតផលផ្សេងៗដែលយកមកដាក់តាំងបង្ហាញក្នុងឱកាសនេះ គណៈកម្មការរៀបចំពិព័រណ៍ ផ្តល់ជូននូវទីតាំងសម្រាប់តាំងបង្ហាញទាំង៣ថ្ងៃ ដោយពុំគិតកម្រៃឡើយ។ ចំណែកឯផលិតផលដែលតាំងបង្ហាញសុទ្ធសឹងជាផលិត ផលសិប្បកម្មផលិតក្នុងស្រុកដែលធ្វើដោយដៃរួមមាន ហូល ផាមួង ហូលពិតាន ក្រមា ក្រណាត់ក្រនៀវ គ្រឿងអលង្ការខ្មែរ តម្បាញខ្សែដៃ ឌុក ស្មាច់ ចម្លាក់ថ្ម ចម្លាក់ឈើ ចម្លាក់ស្បែក សិប្បកម្មច្នៃពីដូង ពីស្លឹកត្នោត ស្ងួនផ្ទាំង និង ចចូត ជាដើម។ 

    ថ្លែងបើកពិពរណ៌នេះ លោកជំទាវ ឡងឌី សាន់ណារ៉ា រដ្ឋលេខាធិការ តំណាងលោកជំទាវបណ្ឌិតសភាចារ្យរដ្ឋមន្ត្រីក្រសួងវប្បធម៌និងវិចិត្រសិល្បៈបានមានប្រសាសន៍ថា ក្រសួងវប្បធម៌ តែងស្វាគមន៍ចំពោះការចូលរួមពីគ្រប់មជ្ឈដ្ឋាន និង ទទួល ស្គាល់ពីសារៈសំខាន់នៃការចូលរួមរបស់អង្គការ សមាគម ផ្នែកឯកជន និងសហគមន៍ ក្នុងភាពជាដៃគូរវាងរដ្ឋ និងឯកជន សំដៅរួមគ្នាលើកស្ទួយវិស័យសិល្បៈវប្បធម៌ជាតិ ដោយជំរុញលើកទឹកចិត្តឲ្យមាន ការបង្កើតផលិតផលវប្បធម៌ថ្មីៗ លើកកម្ពស់ ឧស្សាហ កម្មវប្បធម៌និងច្នៃប្រតិដ្ឋ ដើម្បីឆ្លើយតបទៅនឹងតម្រូវការរបស់សង្គម និងភ្ញៀវ ទេសចរជាតិ អន្តរជាតិ។ មួយវិញ ទៀត ក្រសួងតែងគាំទ្រ និងលើកទឹកចិត្តឱ្យមានការរៀបចំព្រឹត្តិការណ៍វប្បធម៌ និងបង្កើតទីផ្សាវប្បធម៌ថ្មីៗថែមទៀត ដើម្បីទាញយកផលកម្រៃមកទ្រទ្រង់ជីវភាពរបស់សិល្បករ សិប្បករយើង ក៏ដូចជាដើម្បីរួមចំណែកលើកកម្ពស់តម្លៃសិល្បៈវប្បធម៌ និង កិត្យានុភាពជាតិ ស្របតាមទិសស្លោក កម្ពុជាព្រះរាជាណាចក្រនៃវប្បធម៌។

 លោកជំទាវបញ្ជាក់ថា ពិតណាស់ ព្រះរាជាណាចក្រកម្ពុជាយើង គឺជាទឹកដីសម្បូណ៌ទៅដោយមរតកវប្បធម៌ ទាំងរូបី និងអរូបី ដែលបុព្វបុរសដូនតាបានបន្សល់ទុកមកជាច្រើនជំនាន់ ដែលក្លាយជាដួងព្រលឹង និងជាអត្តសញ្ញាណដ៏រឹងមាំងរបស់ជាតិ។ ភាពសម្បូរបែបនៃមរតកវប្បធម៌ខ្មែរទាំងនេះ គឺជាធនធានជាតិដ៏មានតម្លៃ និងជាសក្តានុពលដ៏សំខាន់មួយក្នុងការរួម ចំណែកអភិវឌ្ឍសេដ្ឋកិច្ច និងសង្គម ជាពិសេសតាមរយៈការទាក់ទាញចំណូលពីវិស័យទេស ចរណ៍។ ដើម្បីឈានទៅសម្រេចបានគោលដៅខាងលើនេះ យើងត្រូវបន្តចូលរួមទាំងអស់គ្នា ក្នុងការលើកស្ទួយសិល្បៈវប្បធម៌ជាតិ និងជួយពង្រឹងតួនាទីវប្បធម៌ក្នុងការ អភិវឌ្ឍប្រទេស ដោយលើកកម្ពស់ការប្រើប្រាស់ និងការផ្សព្វផ្សាយផលិតផលវប្បធម៌ជាតិឱ្យបានទូលំទូលាយ។

  លោកជំទាវបន្តថា ជាមួយនឹងកិច្ចខិតខំប្រឹងប្រែងនេះ យើងក៏ជួបបញ្ហាប្រឈមមួយចំនួនក្នុងការថែរក្សា ការពារ ជាពិសេស មរតកវប្បធម៌អរូបី ដូចជា ចំណេះដឹង បច្ចេក ទេស និងជំនាញ ប្រពៃណី បើមិនបានធ្វើការផ្ទេរចំណេះ ដឹងទាំងនោះទៅអ្នកបន្តវេន និងមិនបានសិក្សា ចងក្រងទុកជាឯកសារនោះទេ។ ដូច្នេះហើយ ក្នុងឆ្នាំ២០២៤នេះ ក្រសួងវប្បធម៌និង វិចិត្រសិល្បៈ បានចាប់ផ្ដើមបើកវគ្គបណ្តុះបណ្តាលជំនាញដូនតា ដែលជាកម្មវិធីគោលនយោ បាយអាទិភាពមួយនៃយុទ្ធសាស្ត្របញ្ចកោណដំណាក់ កាលទី១របស់រាជរដ្ឋាភិបាល សម្រាប់យុវជន ពិសេសយុវជនមកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេស ដើម្បីទទួលបាននូវការបណ្តុះបណ្តាលជំនាញវិជ្ជាជីវៈដូនតា ក្នុងគោលបំណងធានាឱ្យបាននូវការ ផ្ទេរចំណេះដឹងនិងជំនាញប្រពៃណី ពិសេសជំនាញ សិប្បកម្ម និងសិល្បៈដល់យុវជនជំនាន់ក្រោយ។ដូច្នេះ ព្រឹត្តិការណ៍ពិព័រណ៍សិប្បកម្មខ្មែរនាពេលនេះ មិនត្រឹមតែជាការបង្ហាញអំពីផលិតផលសិល្បៈសិប្បកម្មខ្មែរប៉ុណ្ណោះទេ ប៉ុន្តែថែមទាំងមានសារៈសំខាន់ចូលរួមចំណែកថែរក្សា និងលើកតម្លៃសិល្បៈវប្បធម៌ខ្មែរយើងផងដែរ។ ម៉្យាងទៀត ការរៀបចំព្រឹត្តិការណ៍នេះ ក៏អាចជួយបំផុសនិងដាស់ស្មារតីដល់យុវជនដែលជាអ្នកបន្តវេន ឱ្យបានឃើញ និងយល់ដឹងកាន់តែច្បាស់ថែមទៀតអំពីលក្ខណៈពិសេស និងភាពសម្បូរបែបនៃសិល្បៈវប្បធម៌ខ្មែរ ដែលនេះគឺជាវិធីដ៏មាន ប្រសិទ្ធភាពមួយ ក្នុងការផ្សព្វផ្សាយបញ្ជៀបការយល់ដឹង បណ្តុះស្មារតីឱ្យចេះស្រឡាញ់ និងជំរុញការចូលរួមរបស់យុវជន ក្នុងសកម្មភាពអភិរក្ស និងអភិវឌ្ឍវប្បធម៌ជាតិឱ្យបានគង់វង្ស និងរីកចម្រើន នាពេលអនាគត៕  អត្ថបទ ៖ ភារម្យ