ក្រុមប្រឆាំងប៉ាឡេស្ទីន ដែលខ្លះមានជម្លោះអស់រយៈពេលជិតពីរទស្សវត្សមកហើយ កំពុងជួបប្រជុំគ្នានៅទីក្រុងមូស្គូ ដើម្បីពិភាក្សាអំពីការបង្កើតរដ្ឋាភិបាលថ្មី ប៉ុន្មានថ្ងៃបន្ទាប់ពីរដ្ឋាភិបាលនៃអាជ្ញាធរប៉ាឡេស្ទីន លាលែងពីតំណែង។

លោក Hussein Hamayel អ្នកនាំពាក្យគណបក្សនយោបាយ Fatah បានប្រាប់សារព័ត៌មាន CNN កាលពីថ្ងៃពុធថា គោលបំណងនៃកិច្ចពិភាក្សារយៈពេលពីរថ្ងៃ គឺដើម្បីបង្រួបបង្រួមក្រុមប្រឆាំង នៅក្រោមអង្គការរំដោះប៉ាឡេស្ទីន (PLO) ជាសម្ព័ន្ធនៃគណបក្សទាំងអស់ ដែលបានចុះហត្ថលេខាលើសន្ធិសញ្ញាសន្តិភាពជាមួយអ៊ីស្រាអែលក្នុងឆ្នាំ ១៩៩៣ និងបង្កើតរដ្ឋាភិបាលថ្មី នៅក្នុងអាជ្ញាធរប៉ាឡេស្ទីន (PA)។

ប្រព័ន្ធផ្សព្វផ្សាយរុស្ស៊ី បានរាយការណ៍ថា ក្រុមហាម៉ាស ដែលកំពុងប្រយុទ្ធនឹងសង្គ្រាមជាមួយអ៊ីស្រាអែលនៅតំបន់ហ្កាហ្សា ដែលបានសម្លាប់មនុស្សជាង ៣០.000នាក់ នៅក្នុងដែនដីនេះ កំពុងចូលរួមកិច្ចពិភាក្សានេះ។ វាមិនមែនជាផ្នែកនៃអង្គការរំដោះប៉ាឡេស្ទីនទេ ហើយក៏មិនទទួលស្គាល់អ៊ីស្រាអែលដែរ។

លោក Khaled Elgindy មន្ត្រីជាន់ខ្ពស់នៅវិទ្យាស្ថានមជ្ឈិមបូព៌ានៅរដ្ឋធានីវ៉ាស៊ីនតោន បាននិយាយថា៖ «ការដាក់បញ្ចូលក្រុមហាម៉ាស រួមជាមួយនឹងក្រុមប្រឆាំងផ្សេងទៀត ដែលនៅខាងក្រៅអង្គការរំដោះប៉ាឡេស្ទីន(PLO)គឺជាជំហានសំខាន់មួយសម្រាប់កំណែទម្រង់ និងការរស់ឡើងវិញនៃPLO។ បើមិនដូច្នេះទេ PLO មិនអាចអះអាងដោយស្របច្បាប់ថា ជាតំណាងពិតប្រាកដនោះទេ។