ក្រសួងមហាផ្ទៃបានប្រាប់ឲ្យដឹងថា ប្រទេសប៉ូឡូញនឹងបញ្ចប់ការរឹតបន្តឹងដែលបន្លាយពេលវេលាម្ដងហើយម្ដងទៀតតាមបណ្ដាយព្រំដែនជាមួយស្លូវ៉ាគី នៅពាក់កណ្តាលអធ្រាត្រ នាយប់ថ្ងៃសៅរ៍ (ទី២ ខែមីនា) បន្ទាប់ពីមានការធ្លាក់ចុះនូវការគំរាមកំហែងនៃការធ្វើអន្តោប្រវេសន៍ដោយខុសច្បាប់ ឆ្លងកាត់ផ្នែកខ្លះនៃព្រំដែននោះ។

ស្លូវ៉ាគីជាប្រទេសឈប់សំចតឆ្លងកាត់ សម្រាប់ជនអន្តោប្រវេសន៍ ដោយភាគច្រើនមកពីមជ្ឈិមបូព៌ា និងអាហ្វហ្គានីស្ថាន ដែលស្វែងរកផ្លូវទៅអឺរ៉ុបខាងលិច ជាពិសេសអាល្លឺម៉ង់ បន្ទាប់ពីឆ្លងចូលទៅក្នុងសហភាពអឺរ៉ុប (EU) តាមរយៈប្រទេសហុងគ្រី ដោយចាកចេញពីស៊ែប៊ី ដែលមិនមែនជាប្រទេសសមាជិករបស់ EU។

ប្រទេសប៉ូឡូញ សាធារណរដ្ឋឆែក និងអូទ្រីស សុទ្ធតែបានរឹតបន្តឹងព្រំដែនរបស់ខ្លួនជាមួយស្លូវ៉ាគី កាលពីថ្ងៃទី៤ ខែតុលា។ វិធានការនេះត្រូវបានបន្លាយពេលវេលាបន្ថែមបន្តបន្ទាប់ជាច្រើនដង។

ក្រសួងមហាផ្ទៃប៉ូឡូញ នៅថ្ងៃសុក្រ (ទី១ ខែមីនា) នេះ បានឲ្យដឹងថា៖ «ការសម្រេច (ដើម្បីបញ្ចប់ការរឹតបន្តឹង) ត្រូវបានជំរុញដោយស្ថិរភាពនៃស្ថានភាពការធ្វើអន្តោប្រវេសន៍ ពោលគឺជាអ្វីដែលត្រូវបានហៅថា មាគ៌ារបស់ប្រទេសនៃតំបន់បាល់កង់ និងការអស់ទៅនូវការគំរាមកំហែងនៃការធ្វើអន្តោប្រវេសន៍ខុសច្បាប់ នៅផ្នែកខ្លះនៃព្រំដែនរដ្ឋរបស់ប៉ូឡូញ-ស្លូវ៉ាគី»។

ប៉ូឡូញ ស្លូវ៉ាគី សាធារណរដ្ឋឆែក ហុងគ្រី និងអូទ្រីស សុទ្ធតែជាផ្នែកនៃតំបន់ Schengen ដែលជាព្រំដែនបើកចំហរបស់អឺរ៉ុប៕