នគរបាលកូរ៉េខាងត្បូងបានបើកការវាយឆ្មក់មួយ នៅថ្ងៃសុក្រ (ទី១ ខែមីនា) នេះ ដែលសំដៅទៅលើមន្ត្រីនៃសមាគមគ្រូពេទ្យកូរ៉េ (KMA) ខណៈដែលអាជ្ញាធរបង្កើនសម្ពាធ ដើម្បីឲ្យបញ្ចប់ការដើរចេញមិនធ្វើការ ពីសំណាក់គ្រូពេទ្យហាត់ការដែលតវ៉ាប្រឆាំងនឹងផែនកំណែទម្រង់ប្រព័ន្ធសុខាភិបាល។

ការវាយឆ្មក់នេះកើតមានឡើងនៅមុនមហាបាតុកម្ម នៅទីក្រុងសេអ៊ូលដែលគ្រោងធ្វើនៅថ្ងៃអាទិត្យ (ទី៣ ខែមីនា) ដោយគ្រូពេទ្យ បន្ទាប់ពីការដើរចេញមិនធ្វើការដែលបានចាប់ផ្តើមនៅថ្ងៃទី២០ ខែកុម្ភៈ បានរំខានដល់មន្ទីរពេទ្យធំៗជាច្រើន ដោយបង្ខំឲ្យមន្ទីរពេទ្យមួយចំនួនបដិសេធមិនទទួលអ្នកជំងឺ ហើយលុបចោលការវះកាត់ និងនីតិវិធីវេជ្ជសាស្រ្តផ្សេងទៀត។

បន្ទាប់ពីមានការវាយឆ្មក់លើមេដឹកនាំនៃគណៈកម្មាធិការសង្គ្រោះបន្ទាន់របស់ខ្លួន សមាគម KMA ដែលតំណាងឲ្យគ្រូពេទ្យឯកជន បានលើកឡើងនៅក្នុងសេចក្តីថ្លែងការណ៍មួយថា៖ «ក្រុមគ្រូពេទ្យមានការខឹងសម្បានឹងអាកប្បកិរិយាមិនសមហេតុផលរបស់រដ្ឋាភិបាលនេះ។ រដ្ឋាភិបាលបានបង្ហាញយ៉ាងច្បាស់ថា គ្រូពេទ្យនៅកូរ៉េខាងត្បូងមិនអាចទទួលបានសេរីភាពនោះទេ»។

សមាគមនេះបានបដិសេធថា ខ្លួនមិនបានលើកទឹកចិត្តគ្រូពេទ្យហាត់ការលាឈប់នោះទេ ដោយនិយាយថា ពួកគេបានចាកចេញពីការងារនេះដោយឆន្ទៈរបស់ពួកគេ។ ទីភ្នាក់ងារសារព័ត៌មាន Yonhap បានរាយការណ៍ថា ក្រុមអ្នកស៊ើបអង្កេតនគរបាលក្រុងសេអ៊ូលបានឆ្មក់ចូលការិយាល័យរបស់ KMA ដែលមានមន្ត្រីទាំងបច្ចុប្បន្ន និងអតីតចំនួន ៥នាក់ ដើម្បីប្រមូលភស្តុតាងពីទូរសព្ទដៃ និងកុំព្យូទ័ររបស់ពួកគេ។

ទីភ្នាក់ងារសារព័ត៌មាននេះ បានបន្ថែមទៀតថា ក្រសួងសុខាភិបាល ក្នុងសប្តាហ៍នេះ បានប្រាប់នគរបាលពីការចោទប្រកាន់ដែលថា មន្ត្រីបានព្យាយាមរារាំងមិនឲ្យមានសកម្មភាពអាជីវកម្ម និងបានជួយគាំទ្រកូដកម្ម ព្រមទាំងផ្គើននឹងបញ្ជាឲ្យចូលធ្វើការវិញទៀតផង។ នគរបាលក្នុងរដ្ឋធានីនេះមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕