ភ្នំពេញ ៖ សម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាប្រធានមូលនិធិទ្រទ្រង់ការសាងសង់វិមានឈ្នះ ឈ្នះ បានលើកឡើងថា ខ្សែចរន្តនៃនយោបាយឈ្នះឈ្នះ នៅតែស្ថិតក្នុងគោលនយោបាយជាតិ និងជាគោលដៅអភិវឌ្ឍតំបន់អតីតសមរភូមិឱ្យទៅជាទីឋានសុខដុម ការធ្វើឱ្យរីកចម្រើនក្នុង វិស័យសេដ្ឋកិច្ច ពាណិជ្ជកម្ម ដែលប្រការនេះ បង្កើតបានជាសមិទ្ធផលសម្រេចបានសម្រាប់ប្រជាជាតិជាបន្តបន្ទាប់ ក្នុងរយៈពេល២៥ឆ្នាំកន្លងមកនេះ។

 ក្នុងឱកាសអញ្ជើញជាអធិបតីភាពពិធីផ្សព្វផ្សាយការរៀបចំសមិទ្ធផលប្រវត្តិសាស្ត្រ «សួនតេជោសន្តិភាព» នារសៀលថ្ងៃទី១ ខែមីនា ឆ្នាំ២០២៤ នៅទីស្ដីការក្រសួងការពារជាតិ សម្តេចពិជ័យសេនា ទៀ បាញ់ បានថ្លែងថានយោបាយឈ្នះ ឈ្នះ បានប្រែក្លាយកម្ពុជាដែលពីអតីតកាលជាវាលពិឃាដ ជាតំបន់អសន្តិសុខ ចម្ការមីន ដែលមនុស្សគ្រប់គ្នាមានការភ័យខ្លាច ហើយវាបានក្លាយជាតំបន់ និងជាប្រទេសមានសន្តិភាពពេញលេញ និងជាទីតាំងតំបន់ទេសចរណ៍ដ៏ទាក់ទាញមួយក្នុងតំបន់អាស៊ីអាគ្នេយ៍ផងដែរ។

សម្តេចពិជ័យសេនា ទៀ បាញ់ បានលើកឡើងទៀតថា សមិទ្ធផលនៃនយោបាយឈ្នះ ឈ្នះ បានផ្តល់ជាកាលានុវត្តភាពជាច្រើនអានេក សម្រាប់ប្រជាជនកម្ពុជានូវសន្តិភាពទូទាំងប្រទេស ធ្វើឱ្យឈានទៅរកភាពរុងរឿងនៅក្នុងសង្គមគ្រួសា ជាមួយនឹងការអភិវឌ្ឍសំណង់ ហេដ្ឋារចនាសម្ព័ន្ធ ទំនាក់ទំនងពាណិជ្ជកម្ម កំណើនវិនិយោគិន លំហូរនៃវិស័យទេសចរណ៍ ដែលជាកត្តារុញច្រានសេដ្ឋកិច្ចកម្ពុជាឱ្យមានការរីកចម្រើន លូតលាស់ជាបន្តបន្ទាប់ទៀត។ 

សម្តេចពិជ័យសេនា ទៀ បាញ់ បានបន្ថែមទៀតថា ជាក់ស្តែងបច្ចុប្បន្ននេះបណ្តាខេត្តជាច្រើនបាននឹងកំពុងប្រែក្លាយជាតំបន់គ្មានមីន និងធ្វើបដិវត្តកម្មទៅជាគោលដៅវិនិយោគ និងរីកចម្រើនប្រកបដោយសក្តានុពលខ្លាំងឡើង។ ត្រង់ចំណុចនេះ គឺជាតក្កវិជ្ជានៃនយោបាយឈ្នះឈ្នះ ពោលគឺបន្ទាប់ពីការបញ្ចប់សង្គ្រាមទាំងស្រុង និងទទួលបានសន្តិភាព ពេញលេញនៅកម្ពុជា នាថ្ងៃទី២៩ ខែធ្នូ ឆ្នាំ១៩៩៨។ 

បើតាមអតីតរដ្ឋមន្ត្រីការពារជាតិកម្ពុជារូបនេះ បានបញ្ជាក់ទៀតថា« ប្រការនេះមិនមែនជាការវាយតម្លៃខ្ពស់ពេក និងជ្រុលនិយមទេ ប៉ុន្តែគឺជាសច្ចភាព ដែលមាន និងផ្តល់ជូនមកវិញនូវការដឹងគុណ កតញ្ញូ និងការតបស្នងចំពោះគោលនយោបាយឈ្នះឈ្នះ ដែលបានដឹកនាំប្រទេសកម្ពុជាបញ្ចប់សង្គ្រាមទាំងស្រុង និងបង្កើតបរិយាកាសសុខសន្តិភាពពេញផ្ទៃប្រទេស»។ 

សម្តេចពិជ័យសេនាក៏បានរំលឹកផងដែរថាផ្តើមចេញពីលទ្ធផលដ៏អស្ចារ្យនៃការអនុវត្តនយោបាយឈ្នះ ឈ្នះ ការយល់ពីបច្ច័យ និងផលនានាគួបផ្សំជាមួយសមិទ្ធផលនៃការស្រាវជ្រាវ និងចងក្រងសៀវភៅពាក់ព័ន្ធទៅនឹងគោលនយោបាយឈ្នះ ឈ្នះ បានផ្តល់ជាគោលគំនិតយ៉ាងសំខាន់ ក្នុងការសាងសង់វិមានឈ្នះ ឈ្នះ ឡើង និងឈានទៅសម្រេចបាននូវសំណង់ស្ថាបត្យកម្មមួយដែលមានលក្ខណៈជាសម្បត្តិសាធារណៈ អត្តសញ្ញាណ នៃវប្បធម៌ អរិយធម៌ រួមចំណែក និងចែករំលែកភាពកត្តញ្ញូ ព្រមទាំងជានិមិត្តរូប នៃសន្តិភាពផងដែរ។ បច្ចុប្បន្ននេះ ក៏កំពុងតែបណ្តុះគ្រឹះឡើងនូវស្ថាបត្យកម្មស្តូបឈ្នះឈ្នះ នៅតំបន់ចំនួន៣ទៀត គឺខេត្តកោះកុង ប៉ៃលិន និងអន្លង់វែង ដែលជាភូមិសាស្ត្រសំខាន់ៗនៃការអនុវត្តនយោបាយឈ្នះឈ្នះ៕ អត្ថបទ ៖ បាន ចក់